महंगो समाजसेवा- एनआरएनए यूके अध्यक्षको खर्च ५० हजार पाउण्ड !

 

लन्डन । गैर आवासीय नेपाली संघ बेलायतको आसन्न निर्वाचनका लागि दैनिक जसो उम्मेदवारी घोषणा चलिरहेको छ । अध्यक्षदेखि युवा संयोजकसम्म घोषणा भइसकेको छ । २०१५-२०१७ को एनआरएनए बेलायत कार्यसमिति सहमतिमा छानिएपछि उम्मेदवारी दिने वित्तिकै पद खान पाइने लोभमा यसपटक पनि सञ्चारमाध्यम र सामाजिक सञ्जालबाट घोषणा गर्नेको संख्या ह्वात्तै बढेको छ ।

तर, त्यो पदमा रहंदा वा गर्नुपर्ने आर्थिक जिम्मेवारीबारे भने थोरैलाई थाहा छ । अध्यक्ष पद निर्वाचित भएकै दिनदेखि अन्तिमसम्म दैनिक जसो हुने कार्यक्रममा उपस्थित हुनु पर्नेछ, त्यो पनि आफ्नै खर्चमा । कार्यक्रम स्थल पुगेपछि १०-२० पाउण्ड खर्च भइहाल्छ । प्राय गाउंले समाज र नेपालमा गरिने सहयोगका लागि च्यारिटी कार्यक्रममा बोल्नुपर्ने रकम त अध्यक्षले खल्तीबाटै हाल्नुपर्ने बाध्यता छ ।

वर्तमान एनआरएनए यूके अध्यक्ष मुछेत्र गुरुङका अनुभवमा महिनाको २ हजार पाउण्ड सामाजिक कार्यका लागि खर्च गर्नुपर्छ । गुरुङको भनाईलाई आधार मान्य हो भने दुई वर्ष कार्यकालका लागि करिव ५० हजार पाउण्ड खर्च गर्न तयार हुनुपर्नेछ ।

यसपटक गत वर्षको तुलनामा सदस्यता नवीकरणमा कमी आउने अनुमान स्वयं एनआरएनए अभियन्ताहरुको छ । आइसीसी भवनका लागि लेभीस्वरुप १० पाउण्ड, सदस्यता शुल्क १० पाउण्ड र 
एनआरएनए कार्डका लागि ५ पाउण्ड गरि २५ पाउण्ड सदस्यता शुल्क यस कार्यकालका लागि गरिएपछि सर्वसाधारणको चासो ह्वात्तै घटेको छ ।

बिना ठोस कार्यक्रम सदस्यता शुल्क मात्र बृद्धि गरिने र गैर आवासीय नेपालीका लागि सिन्को नभांच्ने प्रवृत्ति बढेपछि पैसा खर्च गरेर सामाजिक प्रतिष्ठा बढाउने क्लबका रुपमा यस संस्थालाई अधिकांश गैर आवासीय नेपालीले बुझ्न थालेका छन् ।

बेलायतको सन्दर्भमा हेर्ने हो भने अध्यक्ष पदमा दावीसहित उम्मेदवारी दिने हिराधन राई, योगकुमार फगामी, दासुराम पाण्डे मध्येका कसैले पनि एनआरएनए यूकेलाई आत्मनिर्भर बनाउन ठोस कार्यक्रम ल्याएका छैनन् । हजारौं पाउण्ड खर्च गरि आयोजना भएको पत्रकार सम्मेलनमा योजना भने शुन्य जस्तै छन् । अध्यक्ष बन्ने दौडमा रहेका राई र फगामी दैनिक आफन्त र साथीभाईलाई फारम भराउने र आफूले सदस्य संख्या धेरै बनाएर अध्यक्ष बन्ने दाउमा छन् । विगतमा कार्यसमिति उपाध्यक्षको भूमिका निर्वाह गरिसकेका तीनै जनाले नै सदस्य शुल्क बढाउने निर्णयमा हस्ताक्षर गरेका छन् । १ पाउण्डमा बन्ने सामान्य आकारको एनआरएनए कार्डका लागि ५ पाउण्ड तिराउने पनि उनीहरु नै हुन् ।

जबसम्म एनआरएनए यूकेको सञ्चालन ‘मोडालिटी’ मा परिवर्तन हुंदैन, तबसम्म संघ धनीहरुकै क्लव रहने निश्चित प्रायः छ । धनीहरुकै क्लवको रुपमा विकास हुंदै गएको आम गैर आवासीय नेपालीको बुझाइलाई यसले सजिलै पुष्टी समेत गर्छ जसले यसको साख दिनानुदिन घटाउंदै लगेको छ ।

अब भिजन र वुद्धि विवेक भएका तर पैसा नभएका व्यक्ति समेत नेतृत्वमा पुग्ने गरि सञ्चालन कार्यविधि पुनर्संरचना गर्न जरुरी छ नत्र हजारौं पाउण्ड खर्च गर्ने, आफैं सदस्यता बनाउने र पैसाकै बलमा नेतृत्व कब्जा गर्ने व्यक्तिहरु नै संघमा हावी हुने निश्चित छ । जसले आम गैर आवासीय नेपालीलाई संघप्रति आकर्षित गर्न सक्दैन ।