गृहमन्त्री जनार्दन शर्मासंग नेपालका लागि कतारका राजदूत हमरले आज गृह मन्त्रालयमा शिष्टाचार भेटवार्ता गर्नुहुँदै । तस्बिर ः गृह मन्त्रालय-रासस
काठमाडौँ, १६ असार । उपप्रधानमन्त्री कृष्णबहादुर महराले कतारका राजदूतसँग त्यहाँ कार्यरत नेपालीको सुरक्षाका सम्बन्धमा विशेष चासो व्यक्त गर्नुभएको छ ।
कतारका राजदूत अहमद जसिम मोहम्मद अली अल हमरले आज गर्नुभएको शिष्टाचार भेटवार्तामा परराष्ट्रमन्त्री महराले नेपालीको सुरक्षाका बारेमा जानकारी लिनुभयो । आफ्ना नागरिकको सुरक्षाका सन्दर्भमा आफूले दैनिक सूचना लिइरहेको बताउँदै मन्त्री महराले नेपालीको सुरक्षाका विषयमा विशेष ध्यान दिन राजदूतसँग आग्रह गर्नुभयो ।
पछिल्लो समय कतारमा देखिएको कूटनीतिक समस्या वार्ता र संवादबाट सुल्झनुपर्नेमा जोड दिँदै उहाँले नेपालले शान्तिपूर्ण तवरबाट समस्याको समाधान होस् भन्ने चाहेको बताउनुभयो । उहाँले आवश्यक परेमा नेपालले पनि शान्तिपूर्ण समाधानका लागि पहल गरिदिने विश्वास दिलाउनुभयो ।
मन्त्री महराले कतारका व्यवसायीले अन्य अरब मुलुकमा सञ्चालन गरेका कम्पनीमा कार्यरत नेपालीका सन्दर्भमा चासो व्यक्त गर्दै त्यसतर्फ कतारी सरकारको ध्यान जानुपर्ने बताउनुभयो ।
जवाफमा कतारका राजदूत हमरले कतार र अरब राष्ट्रमा कतारका व्यवसायीले सञ्चालन गरेका कम्पनीमा कार्यरत नेपालीको सुरक्षामा आफ्नो सरकारले पूर्ण ध्यान दिने विश्वास दिलाउनुभयो । उहाँले अरब मुलुकमा देखिएको कूटनीतिक समस्याका कारण नेपालीको सुरक्षामा कुनै समस्या नभएको स्पष्ट गर्दै आगामी दिनमा दुई देशबीच रहिआएको सम्बन्ध अझ प्रगाढ हुने विश्वास व्यक्त गर्नुभयो ।
यसैबीच परराष्ट्रमन्त्री महरासँग दक्षिण एसियाली क्षेत्रीय सहयोग सङ्गठन ‘सार्क’ का महासचिव अम्जद हुसेनले आज नै शिष्टाचार भेटवार्ता गर्नुभयो । परराष्ट्र मन्त्रालयमा भएको भेटवार्तामा उहाँहरुबीच सार्कलाई क्रियाशील बनाउने सन्दर्भमा भएका निर्णयलाई द्रुत तवरले अगाडि बढाउने विषयमा छलफल भयो । सो अवसरमा मन्त्री महराले सार्कको मन्त्रिस्तरीय बैठक अगाडि बढाउन पहल गरिने बताउनुभयो ।
उहाँले सार्क शिखर सम्मेलनका लागि उपयुक्त वातावरण बनाउन नेपालले पहल गर्ने तथा सदस्य राष्ट्रबीच निरन्तर रुपमा द्विपक्षीय एवम् बहुपक्षीय छलफल गरेर अगाडि बढ्ने बताउनुभयो ।
सो अवसरमा महासचिव हुसेनले सार्कलाई चलायमान गराउन सदस्य राष्ट्रले सक्रियता देखाउनुपर्नेमा जोड दिनुभयो ।
त्यसैगरी परराष्ट्रमन्त्री महरासँग नेपालका लागि जापानका राजदूत मासाशी ओगावाले शिष्टाचार भेटवार्ता गर्नुभयो । सो अवसरमा उहाँहरुबीच द्विपक्षीय सहयोग आदानप्रदान तथा आपसी हित र चासोका विषयमा छलफल भएको परराष्ट्रमन्त्रीका प्रेस संयोजक हरि लामिछाने जानकारी दिनुभयो ।
नेपाल कतारबीच सहयोग आदानप्रदान आवश्यक
काठमाडौँ, १६ असार । गृहमन्त्री जनार्दन शर्माले नेपालका लागि कतारका राजदूत हमरसँग आज भएको भेटमा कतारको विकासमा नेपाली नागरिकको श्रम तथा सीपको लगानी भएको र उसको समृद्धिमा नेपाल सन्तुष्ट भएकोे बताउनुभएको छ ।
गृह मन्त्रालयमा आज भएको शिष्टाचार भेटवार्तामा मन्त्री शर्माले दुवै राष्ट्रबीच आपसी सहयोग आदानप्रदान गर्न आवश्यक रहेको बताउँदै सन् २०२२ मा कतारमा हुन लागेको विश्वकपको सफलताको शुभकामना दिनुभयो ।
यसैगरी कतारी राजदूतले पहिलो र दोस्रो चरणको स्थानीय तहको निर्वाचन व्यवस्थित तथा शान्तिपूर्ण ढङ्गले सम्पन्न गराउन सफल भएकामा गृहमन्त्री शर्मालाई बधाई दिनुभयो । राजदूत हमरले कतारमा हुन लागेको विश्वकप फुटबलको तयारी लगभग पूरा भएको जानकारी गराउँदै नेपालसँगको मैत्रीपूर्ण सम्बन्ध आगामी दिनमा थप प्रगाढ बन्ने विश्वास व्यक्त गर्नुभएको गृहमन्त्रीको सचिवालयले जारी गरेको विज्ञप्तिमा उल्लेख छ ।
