प्रधानसेनापति बेलायत आउंदै

लन्डन । प्रधानसेनापति राजेन्द्र क्षेत्री रक्षासम्बन्धी कार्यक्रममा भाग लिन बेलायत आउने भएका छन् । उनी संयुक्त राज्य अमेरिका र संयुक्त अधिराज्य (बेलायत) का लागि आज शुक्रबार नेपालबाट प्रस्थान गर्ने कार्यक्रम छ ।

राससका अनुसार संयुक्त राष्ट्रसंघको मुख्यालय, न्यूयोर्कमा असार २३ गते आयोजना हुने विश्व शान्ति कार्यमा शान्ति सैनिक पठाउने देशको दोस्रो प्रमुख रक्षा सम्मेलन तथा बेलायतका सेनाध्यक्षको औपचारिक निमन्त्रणामा उनी यी दुई मुलुकतर्फ जान लागेका हुन् ।

राष्ट्रसंघ मुख्यालय, भ्रमणका क्रममा प्रधानसेनापति क्षत्री असार २३ गते संयुक्त राष्ट्रसंघ मुख्यालयमा आयोजना हुने दोश्रो प्रमुख रक्षा सम्मेलनमा सहभागी हुने सैनिक जनसम्पर्क निर्देशनालयले जनाएको छ ।

भ्रमणका क्रममा प्रधानसेनापति क्षत्रीले विशिष्ट व्यक्तिसंग छुट्टाछुट्टै भेटघाटका साथै राष्ट्रसंघको शान्ति सैनिक मिसन कङ्गो तथा दक्षिण सुडानका सैनिक नेतृत्वसंग समेत छुट्टाछुट्टै भेटघाट गर्नेछन् ।

भ्रमण कार्यक्रममा प्रधानसेनापतिको साथमा रक्षा सचिव श्रीधर सापकोटा हुनेछन् । बेलायतको औपचारिक भ्रमणका क्रममा प्रधानसेनापति क्षत्रीले बेलायतका रक्षामन्त्री र बेलायती सेनाका प्रमुखसंग छुट्टाछुट्टै भेटघाट गर्नुका साथै बेलायती सेनाको सैनिक मुख्यालय एवम् विभिन्न सैनिक एकाइको समेत भ्रमण गर्ने कार्यक्रम छ ।

प्रधानसेनापति क्षत्री यही असार ३१ गते स्वदेश फिर्ता हुने जनाइएको छ ।