बुधबार, असोज १४ २०७७ | Wed, September 30, 2020
नेपालको समय: ०८:४० | UK Time: 03:55

बेलायत नेपाली कलाकारमय, अवार्ड थाप्न दुई दर्जन कलाकार लन्डनमा

वीनेपाली
२०७४ असार १६ गते ७:२३

तस्विर ः बीरेन्द्र श्रेष्ठ

लन्डन । ‘दशौं नेशनल बक्स अफिस फिल्म फेयर अवार्डस’ कार्यक्रमका लागि नेपालबाट झण्डै दुई दर्जन कलाकार लन्डन आइपुगेका छन् । थर्ड आइले शनिबार बेलायतको अल्डरसटस्थित एम्पायर हलमा गर्न लागेको कार्यक्रममा सहभागी हुन पहिलो चरणमा कलाकार, प्राविधिकसहित २६ जना बिहीबार सांझ लन्डन उत्रिएका हुन् ।

कलाकारहरु करिष्मा मानन्धर, आर्यन सिग्देल, अनुप विक्रम शाही, केकी अधिकारी, अशिष्मा नकर्मी, वर्षा सिवाकोटी, सुरबीना कार्की, नम्रता योगी, सलोन बस्नेत, गायक आनन्द कार्की, संगीतकार शिखर सन्तोष, प्रदीप उदय, पुस्कर लामा, रामकेशर बोगटी, ज्ञानेन्द्र देउजा, सुन्दरलाल श्रेष्ठ, कुशल थापा आदि लन्डन आएका हुन् । आयोजक थर्ड आइका अनुसार शुक्रबार पनि अन्य कलाकारहरु बेलायत आउने कार्यक्रम छ ।

‘पहिलो पटक बेलायत आउंदा ज्यादै उत्साहित छु’, नायक आर्यन सिग्देलले भने, ‘सात समुद्रपार हुन लागेको अवार्डस कार्यक्रमले नेपाली चलचित्र विकासमा फड्को मार्ने मेरो विश्वास छ ।’

तस्विर सौजन्य ः बीरेन्द्र श्रेष्ठ

नायिका करिष्मा मानन्धरलाई बेलायत नौलो होइन । कस्तुरी फिल्म निर्माणले उनलाई बेलायतकै पिआर होल्डर बिनोद मानन्धरसंग घरजम गरायो । पछिल्लोपटक सन् २०१० मा बेलायत आएकी करिष्माले यसपटक अवार्डसमा भाग लिन आउंदा बेग्दै उत्साह जागेको बताइन् । ‘यसले अन्तर्राष्ट्रिय बजारमा नेपाली चलचित्र प्रवर्धन गर्न सघाउनेछ’, उनले भनिन् ।
नायिकाहरु केकी अधिकारी, सुरबीना कार्की र नम्रता योगी पनि हिथ्रो ओर्लंदा थकित तर उत्साहित देखिन्थे । ‘हामी कलाकर्मीहरुको चाहना नै नेपाली चलचित्र क्षेत्रले गति लिइरहोस् भन्ने हो’, केकीले भनिन्, ‘विदेशमा यस्ता कार्यक्रमले नेपाली दर्शकसंग प्रत्यक्ष साक्षात्कार गराउन पनि मद्दत पुग्छ ।’

सोमबार स्वदेश फर्कनुअघि कलाकारहरु सेन्ट्रल लन्डन घुम्ने योजनामा छन् ।

बेलायतमा पहिलोपटक हुन लागेको अवार्डस कार्यक्रमको उद्देश्य नेपाली चलचित्र प्रवर्धन गर्नु रहेको कार्यक्रम संयोजक थर्ड आइका विकास देवकोटाले बताए ।

तस्विर सौजन्य ः बीरेन्द्र श्रेष्ठ

तस्विरः एभरेष्ट गौतम

प्रतिक्रिया

सम्बन्धित सामाग्री

फेसबुक