शुक्रबार, असोज ९ २०७७ | Fri, September 25, 2020
नेपालको समय: २२:०५ | UK Time: 17:20

मुग्लिन सडक अवरुद्ध, वैकल्पिक सडक प्रयोग गर्न अपिल

वीनेपाली
२०७४ असार ११ गते ८:३१

नारायणगढ–मुग्लिन सडकखण्डको कालिखोला नजिकै बिहीबार राति खसेको पहिरो पन्छाइँदै । पहिरोमा ईलाका प्रहरी कार्यालय मुग्लिनको भ्यान र एक ट्रक भीरबाट झर्दा भ्यानमा सवार प्रहरी सहायक निरीक्षकसहित दुईजना प्रहरीको मृत्यु हुनुको साथै दुई जना प्रहरी जवान बेपत्ता भएका छन् । तस्बिर ः नारायण अधिकारी, चितवन, रासस

रत्ननगर (चितवन), ११ असार । चितवनको नारायणगढ–मुग्लिन सडकखण्डअन्तर्गत विभिन्न ठाउँमा खसेको पहिरोका कारण गएराति ९ बजेदेखि यातायात आवागमन अवरुद्ध भएको छ ।

जिल्ला प्रहरी कार्यालय, चितवनका अनुसार इच्छाकामना गाउँपालिका वडा नं ६ स्थित उक्त सडकको चार किलो, दुई किलो, खहरे र कालीखोलामा पहिरो खसेर सडक अवरुद्ध भएको हो ।

चितवनका प्रहरी उपरीक्षक दीपक थापाले पहिरो खस्ने क्रम जारी रहेकाले राति पन्छाउन नसकेपछि आज बिहान ४ बजेबाट मात्रै पहिरो पन्छाउने काम सुरु गरिएको जानकारी दिनुभयो ।

ट्राफिक प्रहरीले अवरुद्ध सडक खुलाउन समय लाग्ने भएकाले वैकल्पिक मार्ग प्रयोग गर्न सवारी चालकलाई सार्वजनिक अपिल गरेको छ ।

राति पानी पर्ने क्रम र पहिरो खस्ने क्रम चलेकाले पहिरो हटाउन नसकिएको हो । पहिरोका कारण चितवनबाट काठमाडाँै र पोखरालगायत क्षेत्रमा जाने र आउने सवारीको लामो लाइन छ ।

गएको शुक्रबार मात्रै यहाँको कालीखोला नजिकै पहिरो खसेर १७ घन्टा पछि बाटो खुलेको थियो । सो पहिरोले बगाएर दुई प्रहरीको मृत्यु भएको थियो भने भ्यानसहित दुई प्रहरी बेपत्ता छन् ।

बेपत्ता प्रहरी खोज्न पाँच टोली परिचालन, कुकुरको पनि प्रयोग

रत्ननगर (चितवन), १० असार । चितवनको इच्छाकामना गाउँपालिका वडा नं ६ स्थित कालीखोलामा शुक्रबार बिहान पहिरोसँगै बगेर बेपत्ता भएका दुई प्रहरी र प्रहरीको भ्यान खोज्न जिल्लाका सबै सुरक्षा निकायका पाँचवटा टोली परिचालन भएका छन् ।

दुईवटा कुकुरसहित पाँचवटा टोलीमा १५० भन्दा बढी सुरक्षाकर्मी परिचालन गरिएको चितवनका प्रहरी प्रमुख तथा प्रहरी उपरीक्षक दीपक थापाले जानकारी दिनुभयो ।

उहाँले बाहिर पहिरोमा पुरिएको अवस्थाको खोजीका लागि कुकुरसहितको टोली परिचालन गरिएको र अन्य विभिन्न क्षेत्रमा खोजीका लागि अलग अलग समूह परिचालन भएको थापाले जानकारी दिनुभयो । डुङ्गाको प्रयोग पनि गरिएको तर नदीमा पानी बढ्दो क्रममा रहेको उहाँको भनाइ छ ।

उहाँका अनुसार जिल्ला प्रहरी कार्यालय, रसौलीमा रहेको सेनाको विपद् व्यवस्थापन गण, द फेमस दल गण, भरतपुरको नारायणी मनिटरिङ प्याट्रोलिङ समूह, कुरिनटारस्थित सशस्त्र प्रहरीको विपद् व्यवस्थापन समूह तथा कुकुरसहितको टोली परिचालन गरिएको छ । अहिलेसम्म प्रहरीको अवस्था पत्ता लाग्न नसकेको प्रहरीले जनाएको छ ।

इलाका प्रहरी कार्यालय, मुग्लिनबाट प्रहरी सहायक निरीक्षक निश्चलकुमार तामाङको नेतृत्वमा पहिरो पन्छाएर फर्कंदै गरेको ना १ झ १३९० नंको प्रहरीसहितको भ्यान शुक्रबार बिहान १ बजेर ५ मिनेटको समयमा कालीखोला नजिकै माथिबाट खसेको पहिरोले बगाएको थियो ।

खोजतलासका क्रममा प्रहरी सहायक निरीक्षक निश्चलकुमार तामाङ र प्रहरी जवान दीपककुमार मास्केको शव नदी किनारमा पुरिएको अवस्थामा फेला पारिएको भए पनि प्रहरी भ्यानसहित प्रहरी जवान लीलबहादुर चेपाङ र सन्दीप कार्की बेपत्ता छन् ।

सँगै बगेको ना ५ ख ७८२७ नंको ट्रक भिरमा अड्किएको अवस्थामा छ । उक्त ट्रकका चालक रामकुमार लामाले भने प्रहरीको गाडी नदीमै पुगेको दाबी गर्नुभयो ।

प्रहरीले गाडी नदीमै खसेको प्रारम्भिक अनुमान गरेपनि अझै यकिन गर्न नसकिएको प्रहरीले जनाएको छ । यो पाँच टोलीको अनुसन्धानले केही पत्ता नलागे गोताखोर टोली मगाउने चितवन प्रहरीले जनाएको छ ।

प्रतिक्रिया

सम्बन्धित सामाग्री

फेसबुक