शर्मिला सपनको गीतमा बन्यो आकर्षक भिडियो

लन्डन । बेलायतको नेपाली समुदायमा नौला होइनन् शर्मिला बर्देवा र सपनकुमार राई । विशेषगरि गीत संगीत क्षेत्रमा उनीहरुको परिचय पुरानो छ । बेलायतका स्थानीय कार्यक्रमहरुमा सक्रिय शर्मिला र सपनले गाएको गीत ‘मेरो मनमा बस मेरो मटुमा बस, 
तिम्रो न्यानो अंगालोमा चोखो मायाले कस’ को म्यूजिक भिडियो सार्वजनिक भएको छ । दुई दिनअघि हाइलाइट्स नेपालले भिडियो सार्वजनिक गरेको हो । रोमान्टिक गीतमा आकर्षक बनेको छ भिडियो ।

शर्मिला-सपनले १७ वर्षपछि एकै ठाउंमा आएर गत वर्ष रेकर्ड गराएका थिए । अहिलेका चल्तीका संगीतकार शिखर सन्तोष बेलायत आएका बेला गीत रेकर्ड भएको थियो । सन् १९९८ मा ड्वेट गाएको यो जोडीले यसपटक किरण कंडेलले लेखेको गीत गाएको हो । करिब डेढ दशकअघि बेलायत आएकी शर्मिला यहां पनि उत्तिकै सक्रिय छिन् । दुई दशकभन्दा बढि समयदेखि बेलायत रहेका सपन इन्टरटेनमेन्ट लि.का प्रोपाइटर राईले बेलायतमा हुने धेरै कार्यक्रममा साउण्ड र डिजेका साथ गायनको जिम्मेवारी वहन गर्दै आएका छन् ।

बेलायतको ग्रामीण भेग (कन्ट्री साइड) वरपरका रमणीय स्थानमा छायांकन गरिएको उक्त भिडियो दन्त चिकित्सक तथा चलचित्र निर्माता डा. कपिल रिजालले निर्देशन गरेका हुन् । व्यवसायिक सफल चलचित्र ‘ड्रिम्स’ का सहनिर्माता रिजालले भिडियोमा नयां पन दिने प्रयास गरिएको बताए ।

भिडियो सम्पादन र छायांकन मिडियाकर्मी कुशल श्रेष्ठले गरेका छन् भने अभिनय अन्जु बस्नेत र टंक धमला (लियो ट्यांक) को छ ।
भिडियोको कोरियोग्राफी यूके डान्स अफ २०१६ की फस्ट रनरअप काजल भट्टचन गुरुङको छ भने मेकअप प्रेक्षा बस्नेत गुरुङले गरेकी थिइन् ।

म्यूजिक भिडियो यस्तो छः