लन्डन टावर आगलागीमा मर्नेको संख्या ३०

लन्डन । पश्चिम लन्डनस्थित २४ तले आवासीय भवन (ग्रेनफेल 
टावर) आगलागीमा ज्यान गुमाउनको संख्या बढ्दै गएको छ । 
मंगलबार राती एक बजे शुरु भएको आगलागीमा परि हालसम्म ३० जनाले ज्यान गुमाएको प्रहरीले शुक्रबार दिउसो जनाएको छ ।

मेट्रोपोलिटन पुलिस कमाण्डर स्टुआर्ट कन्डीले उपचार भइरहेका २४ मध्ये १२ जनाको अवस्था चिन्ताजनक रहेको बताए । अझै ७० जना भन्दा बढि हराइरहेका छन् । लन्डन फायर कमिश्नर ड्यानी कटनले ध्वस्त ब्लकबाट मृतक खोज्न कयौं हप्ता लाग्न सक्ने बताएकी छन् ।

प्रहरीले कतिपय शवको पहिचान नै गर्न नसकिएको बताएको छ । बेलायती सञ्चारमाध्यमले आगलागीबाट ज्यान गुमाउनेको संख्या एकसय भन्दा बढि हुन सक्ने उल्लेख गरेका छन् ।

बेलायती महारानी एलिजावेथ द्वितीय र राजकुमार विलियमले शुक्रबार पीडितलाई आश्रय लिइरहेका स्थानमा गएर भेटेका 
छन् । भेटमा महारानीले घट्नाबारे चासो राख्दै सहानुभूति प्रकट गरेकी थिइन् ।

प्रधानमन्त्री टेरेजा मेले आगलागीको सार्वजनिक छानवीन गर्न आदेश दिएपनि उनले घट्नास्थल निरिक्षणका क्रममा पीडित परिवारलाई नभेटी फर्किएर मानवीयता समेत नदेखाएको भन्दै आक्रोश व्यक्त भएको छ । प्रधानमन्त्री मेले चेल्सी र वेष्टमिनिष्टर अस्पताल पुगेर त्यहां उपचारार्थ ८ जना विरामीलाई भने भेटेकी छन् ।

लन्डन मेयर सादिक खानले पनि बिहीबार टावरवासीको कडा आक्रोश सामना गरे । आक्रोशित भीडले मेयर खानसंग आगलागीको जिम्मेवार को हो जवाफ मागिरहेका थिए । झण्डै १८ सय नागरिकले न्याय माग्दै शुक्रबार सांझ वेष्टमिनिष्टरमा प्रदर्शन गर्ने कार्यक्रम छ ।

सन् १९७४ मा निर्मित १२० फल्याट रहेको उक्त टावरमा २४ घण्टासम्म लगातार आगो बलिरहेको थियो । स्कटल्याण्ड यार्डले घट्ना कसरी घट्यो भन्नेबारे अपराधिक अनुसन्धान थालिएको जनाएको छ । प्रतिपक्ष लेबर पार्टीका सांसद डेभिड ल्यामीले घट्नालाई ‘संस्थागत मानवहत्या’ को संज्ञा दिंदै सत्यतथ्य छानवीन गरि दोषीलाई कारवाही गरिनुपर्ने माग गरेका थिए ।