तस्विरः एएफपी
लन्डन । पश्चिम लन्डनको नटिङहिल नजिक रहेको २४ तले आवासीय भवनमा बुधबार बिहान भीषण आगलागी हुंदा मर्नेको संख्या १७ पुगेको छ । प्रहरीले मृतक संख्या अझ बढ्ने जनाएको छ । अस्पतालमा उपचारार्थ घाइते ३७ मध्ये १७ जनाको चिन्ताजनक अवस्थामा उपचार भइरहेको छ । प्रहरीले तालिमप्राप्त कुकुरको सहयोगमा अनुसन्धान थालिएको र यसको वास्तविकता आउन समय लाग्ने जनाएको छ । अग्नी नियन्त्रकहरुले ६५ जनाको सकुशल उद्दार गरेका छन् ।
नर्थ केन्जिङटनको ल्याटिमेर रोडमा अवस्थित १२० फल्याट रहेको ६८ मिटर अग्लो ग्रेनफेल टावर (अपार्टमेन्ट) मा राती करिब एकबजेतिर लागेको आगलागीबाट कयौं हताहत भएको अनुमान छ । भवनभित्र ४ देखि ६ सय मानिस रहेको हुन सक्ने अनुमान गरिएको छ । अझै मानिसहरु हराइरहेका छन् ।
आगलागी भएको स्थान नेपाली दूतावास नजिक छ । दूतावासका उपनियोग प्रमुख शरदराज आरणले दुःखद घट्ना सुन्नुपरेको जनाउंदै नेपाली हालसम्म प्रभावित भएको खबर नआएको बताए । उनले दूतावास मेट्रो पुलिस र काउन्सिलसंग सम्पर्कमा रहिरहेको समेत जनाए ।
कम्तीमा ४५ दमकलमा आएका दुई सय भन्दा बढि अग्नी नियन्त्रकलाई आगो नियन्त्रणमा लिन हम्मे हम्मे परयो । आगो लागेको झण्डै २४ घण्टासम्म पनि भवनमा आगो बलिरहेको देखिन्छ । हेर्दा हेर्दै दोश्रो तलाबाट आगो करिब ३० मिनेट अवधिमा कसरी तीव्र रुपमा माथि फैलियो भन्नेबारे प्रश्न उठेको छ ।
ग्रेनफेल एक्सन ग्रुपले चार वर्ष यता भवनमा विपत्ति आउन सक्ने जोखिमबारे सम्वन्धित निकायलाई अवगत गराइएपनि वेवास्ता गरिएको दावी गरेको छ । ग्रुपले जोखिमबारे केन्जिङटन एण्ड चेल्सी टिनेन्ट म्यानेजमेन्ट अर्गनाइजेशनलाई अवगत गराएको थियो । गत नोभेम्बरमा पनि भवनको ‘फायर सेफ्टी’ बारे प्रश्न उठेको थियो ।
सन् १९७४ मा निर्मित ल्यानक्यास्टर वेष्ट स्टेट टावर गत वर्ष मे २०१६ मा मात्र करिब दश मिलियन पाउण्ड खर्चमा मर्मत सम्भार र स्तरोन्नति गरिएको समाचारमा जनाइएको छ ।
