बस कन्डक्टर हुंदै चौंथोपटक सांसद बनेका शर्मालाई बधाइको ओइरो

लन्डन । लेबर पार्टीको प्रतिनिधित्व गर्दै इलिङ साउथहलबाट चौंथोपटक सांसद बनेका बीरेन्द्र शर्मालाई यतिखेर बधाइको ओइरो छ । शर्माले गत बिहीबार सम्पन्न बेलायतको संसदीय निर्वाचनमा ३१ हजार ७ सय २० मत ल्याएर विजयी हासिल गरेका हुन् । उनका प्रतिद्वन्द्वी कन्जरभेटिभ पार्टीका फाबियो कोन्टीले जम्मा ९ हजार ६३० मत ल्याएका थिए ।

शर्माको विजयले नेपाली समुदाय पनि प्रसन्न छ । भूपू गोर्खा र नेपाली समुदायसंग निकट मानिने शर्मालाई सामाजिक अभियन्ताहरुले घरै गएर बधाइ दिइरहेका छन् । सप्ताहन्त सोलिसिटर राजु थापा, नेपलिज वुमन एसोसिएसन यूके अध्यक्ष आरती श्रेष्ठ, समाजसेवी हरि केसी, रिटायर्ड पाइलट रत्न सागर श्रेष्ठले ढाका टोपी र खादाले सम्मान गर्दै बधाइ दिए ।

शर्माले आफ्नो जीतमा नेपाली समुदायको समेत भूमिका स्मरण गर्दै धन्यवाद दिएका थिए । उनले नेपाली समुदायलाई समेत बेलायतको मुलधार राजनीतिमा आउन सुझाव दिएका छन् ।

शर्मा अघिल्लो संसदमा सर्वदलीय संसदीय समितिको गोर्खा वेलफेयर अध्यक्ष थिए । नेपालीका प्राय कार्यक्रममा उपस्थित हुने उनले पटक पटक नेपाल भ्रमण समेत गरिसकेका छन् ।

बीरेन्द्र शर्मा पहिलो पटक सन् २००७, १९ जुलाइमा सांसद निर्वाचित भएका थिए ।

भारतीय मुलका शर्मा सन् १९६८ मा बेलायत आएका थिए । इलिङमा मेयरसहित २५ वर्ष काउन्सिलर भएका शर्मा शुरुमा हयान्बेल बस्थे र २०७ रुटको बसमा कन्डक्टरको काम गर्थे ।