गोमा एयरको विमान दुर्घटनामा चालकको मृत्यु, दुई गम्भीर

दुर्घटना ग्रस्त गोमा एअरको कार्गो विमान । सोलुखुम्बुको तेञ्जिङ हिलारी विमानस्थलमा अवतरण गर्ने क्रममा सल्लाको रुखमा ठोकिएर भएको उक्त दुर्घटनामा विमान चालक (क्याप्टेन)पारस राईको मृत्यु तथा सहचालक सृजन मानन्धर र परिचारिका प्रज्ञा महर्जन गम्भिर घाइते । तस्बिर सौजन्य ः पत्रकार बिक्रम श्रेष्ठ,रासस

सोलुखुम्बु, १३ जेठ । आज दिउँसो सोलुखुम्बुको तेञ्जिङ हिलारी विमानस्थल नजिक भएको गोमा एयरको विमान दुर्घटनामा घाइते भएका विमान चालक पारसकुमार राईको मृत्यु भएको छ ।

विमानबाट उद्धार गरी लुक्लास्थित पासाङल्हामु निकोलनिकी हस्पिटलमा उपचारका क्रममा विमानका क्याप्टेन राईको ज्यान गएको प्रहरी नायब उपरीक्षक माधव बुढाथोकीले जानकारी दिनुभयो ।

प्रहरीका अनुसार दुर्घटनामा घाइते भएका सहचालक सृजन मानन्धर र परिचारिका प्रज्ञा महर्जनको अवस्था गम्भीर रहेको छ । उनीहरुको लुक्लास्थित पासाङल्हामु निकोलनिकी हस्पिटलमा उपचार भइरहेको छ ।

मौसम खराबीका कारण उनीहरुलाई हेलिकप्टरमार्फत काठमाडौँ लैजान नसकिएको प्रहरी नायब उपरीक्षक बुढाथोकीले जानकारी दिनुभयो ।

गोमा एयरको नाइन एन एक के वाई कलसाइन भएको कार्गो विमान लुक्ला विमानस्थलमा अवतरण गर्ने क्रममा सल्लाको रुखमा ठोक्किएर पाखामा खसेको थियो ।

प्रतिक्रिया

सम्बन्धित सामाग्री