काठमाण्डौं र पोखराको पछिल्लो मत परिणाम

काठमाडौँ, १२ जेठ । काठमाडौँ महानगरपालिकाको वडा नम्बर ११ र १२ को मत परिणाम सार्वजनिक भएको छ । जसमा ११ नम्बर वडाको अध्यक्ष पदमा नेपाली काँग्रेसका हीरालाल तण्डुकार एक हजार १८० मत प्राप्त गरी विजय हुनुभएको छ ।

त्यस्तै महिला सदस्यमा आशा श्रेष्ठ रौनीयार, दलित महिला सदस्य यशोमती परियार, खुल्ला सदस्यमा दिनेश राउत क्षेत्री र सरोजकुमार मुल्मीले विजय हासिल गर्नुभएको छ ।

वडा नं १२ मा एमाले विजयी 

यस्तै वडा नं १२ को मत परिणाम पनि मिश्रित ढङ्गबाट आएको छ । वडा अध्यक्षमा एमालेको तर्फबाट विकास डङ्गोल एक हजार ६७० मत ल्याएर विजय हुनुभएको छ ।

त्यस्तै महिला सदस्यमा नेपाली काँग्रसको उम्मेदवार नानीहिरा डङ्गोल, दलित महिला सदस्य उसीला सिंह विजयी हुनुभएको छ ।

खुल्ला सदस्यमा एमालेका उम्मेदवार रत्नकाजी महर्जन र काँग्रेसका पुष्परत्न प्रजापतिले विजय हासिल गर्नुभएको छ ।

हालसम्म कामपाको ३२ वडामध्ये २७ वडाको मत परिणाम सार्वजनिक भएको छ । जसमा एमालेले १५ र नेपाली काँग्रेसले १२ वडामा जित हासिल गरेको छ ।

पोखरा–लेखनाथ मनपा–३२ मा काँग्रेस र ३३ मा एमाले विजयी

पोखरा,१२ जेठ । पोखरा–लेखनाथ महानगरपालिका–३२ को वडाध्यक्षमा नेपाली काँग्रेसका अक्कलबहादुर कार्की १७ हजार ६९ मत ल्याई विजयी हुनुभएको छ । उहाँका निकटतम प्रतिद्धन्द्वी नेकपा(एमाले)का खम्बबहादुर पुनले १६ हजार ८० मत पाउनु भएको छ ।

वडाको महिला सदस्यमा एमालेकी विष्णुमाया धमला, दलित महिला सदस्यमा सुनमाया नेपाली, खुल्ला सदस्यमा विष्णुप्रसाद तिवारी र खुल्ला सदस्यमा काँग्रेसका धर्मबहादुर बस्नेत निर्वाचित हुनुभएको छ ।

त्यस्तै वडा नं ३३ मा नेकपा(एमाले)को समूह नै विजयी भएको छ । सो वडाको वडाध्यक्षमा एमालेका शिवप्रसाद आचार्य २३ हजार ७३ मत ल्याई विजयी हुनुभएको छ । उहाँका निकटतम प्रतिद्वन्द्वी नेपाली काँग्रेसका भोजराज आचार्यले १७ हजार ६९ मत ल्याउनुभएको थियो ।

महिला सदस्यमा शान्तिदेवी आचार्य, दलित महिला सदस्यमा शोभा सर्किनी, खुल्ला सदस्यमा लीलबहादुर श्रेष्ठ र दीपकराज लामिछाने निर्वाचित हुनुभएको छ ।

काठमाडौँ– १३ मा एमाले विजयी

काठमाडौँ, १२ जेठ । काठमाडौँ महानगरपालिका– १३ को वडाध्यक्षमा नेकपा (एमाले)का धुव्रनारायण मानन्धर तीन हजार ६४ मत प्राप्त गरी विजयी हुनुभएको छ ।

उहाँको निकटतम प्रतिद्वन्द्वी नेपाली काँग्रेसका सुरेन्द्र मानन्धरले एक हजार ९३६ मत ल्याउनुभयो । मुख्य निर्वाचन अधिकृत दीपेन्द्र अधिकारीका अनुसार सो वडामा एमालेको पुरै समूह विजयी भएको छ ।

महिला सदस्यमा तारादेवी मानन्धर दुई हजार ९९७ मत, दलित महिला सदस्यमा मैया देउला दुई हजार ८८५, खुल्ला सदस्यतर्फ रामबाबु कोइरालाले दुई हजार ४१२ र सुन्दरराज वैद्यले दुई हजार ७१९ मत ल्याई विजयी हुनुभएको छ ।

हालसम्ममा २५ वटा वडाको मत परिणाम सार्वजनिक भएकोमा १४ वटा वडामा एमाले र ११ वटामा काँग्रेस विजयी भएको छ ।

पोखरा लेखनाथ महानगर प्रमुखमा जिसी, उपप्रमुखमा मञ्जु विजयी

पोखरा, १२ जेठ । पोखरा लेखनाथ महानगरपालिकाको प्रमुखमा नेकपा (एमाले)का मानबहादुर जिसी ६० हजार ११८ मतसहित विजयी बन्नुभएको छ । उहाँका निकटतम प्रतिद्वन्द्वी नेपाली काँग्रेसका रामजी कुँवरले ४६ हजार ४१६ मत प्राप्त गर्नुभयो ।

महानगरको उपप्रमुखमा एमालेकी मञ्जु गुरुङ ५६ हजार ४४८ मतसहित विजयी बन्नुभएको छ । उहाँका निकटतम प्रतिद्वन्द्वी काँग्रेसकी सरस्वती गुरुङले ४४ हजार ३३८ मत प्राप्त गर्नुभयो ।