राष्ट्रपति आज स्वदेश फर्कने

कोलोम्बो (श्रीलङ्का), २ जेठ । श्रीलङ्का र थाइल्यान्ड गरी पाँचदिने औपचारिक भ्रमणमा रहनुभएकी राष्ट्रपति विद्यादेवी भण्डारी आज आफ्नो भ्रमण सम्पन्न गरी स्वदेश फर्कनु हुने भएको छ ।

गत वैशाख २९ गते थाइल्यान्डको बैङ्कक पुग्नुभएकी राष्ट्रपति भण्डारी सोही दिन साँझ थाइल्यान्डस्थित ग्रान्ड प्यालेसमा राखिएको स्वर्गीय थाई राजा भूमिबल अदुल्यादेजको पार्थिव शरीरमा मल्यार्पण गरी श्रद्धाञ्जलि व्यक्त गर्नुभएको थियो ।

भ्रमणको दोस्रो दिन श्रीलङ्काली समकक्षी राष्ट्रपति मैत्रीपाला सिरिसेनाको औपचारिक निमन्त्रणामा राष्ट्रपति भण्डारी थाइल्यान्डबाट श्रीलङ्काको राजधानी कोलोम्बो जानुभएको थियो ।

बुद्धजयन्तीका अवसरमा श्रीलङ्काले मनाएको संयुक्त राष्ट्रसङ्घीय वैशाख सम्मेलनको समापन समारोहमा राष्ट्रपति भण्डारी प्रमुख अतिथिका रुपमा सहभागी हुनुभयो ।

श्रीलङ्कामा भ्रमणका क्रममा राष्ट्रपति भण्डारीले आफ्ना समकक्षी सिरिसेना, पूर्वराष्ट्रपति चन्द्रिका बन्दारानायकेसँग भेटवार्ता गर्नुभयो ।

भ्रमणको क्रममा राष्ट्रपति भण्डारीले क्यान्डीमा रहेको बुद्धको दाँतको अस्थिधातुको दर्शन गर्नुका साथै श्रीलङ्काले आयोजना गरेकोे संयुक्त राष्ट्रसङ्घीय वैशाख सम्मेलनको समापन समारोहमा प्रमुख अतिथिका रुपमा वैशाख ३१ गते सम्बोधन गर्नुभएको थियो ।

राष्ट्रपति भण्डारी यहाँस्थित बन्दरानायके अन्तर्राष्ट्रिय विमानस्थलबाट श्रीलङ्कन एयरलाइन्सको विशेष विमानबाट भारतको राजधानी नयाँदिल्ली हुँदै नेपाल एयरलाइन्सको विमानबाट बेलुका स्वदेश फर्कनु हुने कार्यक्रम छ ।