नेकपा (एमाले) अध्यक्ष केपी शर्मा ओली बिहीबार चितवनको भरतपुरमा आयोजित बृहत आमसभालाई सम्बोधन गर्दै । तस्बिर ः नारायण ढुंगाना, रत्ननगर(चितवन), रासस
रत्ननगर (चितवन), २८ वैशाख । नेकपा( एमाले) का अध्यक्ष केपी शर्मा ओलीले सबै क्षेत्रमा एमालेको नेतृत्व भयो भने मात्रै देश समृद्ध बन्ने बताउनुभएको छ ।
एमाले भरतपुर महानगर कमिटीको आयोजनामा आज नारायणगढमा भएको आमसभालाई सम्बोधन गर्दै अध्यक्ष ओलीले एमाले राष्ट्रिय एकताका पक्षमा र राष्ट्रिय पहरेदारका रुपमा रहेको उहाँले प्रस्ट गर्नुभयो ।
चुनावमा सरकार धाँधली गर्न उद्दत रहेको आरोप लगाउँदै उहाँले प्रजातान्त्रिक मूल्यमान्यता विपरीत धाँधलीका काम भैरहेको जिकिर गर्नुभयो । “जेठ १५ गते बजेट आउने, जेठ १५ भन्दापछि चुनाव गर्नुपर्ने, चुनावी बजेट सस्तो लोकप्रिय बजेट जारी गर्ने, अनि चुनाव गर्ने, यो धाँधली हो कि होइन ?” नेता ओलीले प्रश्न गर्नुभयो ।
पूर्वप्रधानमन्त्री ओलीले आफूहरुले चुनावमा निष्पक्षता चाहेको बताउँदै प्रशासन र अदालतलाई आतङ्कमुनि राख्ने प्रयास भइरहेको भनी सरकारको आलोचना गर्नुभयो । अध्यक्ष ओलीले ठाउँ ठाउँमा एमालेका कार्यकर्तामाथि हमला भैरहेको बताउँदै दुःख व्यक्त गर्नुभयो । विभिन्न ठाउँमा विभिन्न व्यक्ति मरिरहेको घटना भए पनि न्याय दिन्छु भन्न नसक्नेलाई काँग्रेसले बोकेको उहाँको आरोप थियो ।
कार्यक्रम सुरु हुनुअघि भरतपुरको चौबिसकोठीबाट एमाले कार्यकर्ताहरुले बाजागाजासहित पदयात्रा निकालेका थिए ।
एमालेले ६० प्रतिशत स्थानमा जित्ने जिकिर
काठमाडौँ, २८ वैशाख । नेकपा (एमाले) स्थायी कमिटी सदस्य शङ्कर पोखरेलले स्थानीय तहको निर्वाचनमा आफ्नो पार्टीले ६० प्रतिशतभन्दा बढी स्थानमा विजय हासिल गर्ने जिकिर गर्नुभएको छ ।
एमाले प्रचार तथा प्रकाशन विभागले यहाँ आज आयोजना गरेको पत्रकार भेटघाट कार्यक्रममा नेता पोखरेलले राष्ट्रियता र समृद्धिका लागि आफ्नो पार्टीको स्पष्ट सोच र अडान भएको तथा स्थानीय तहलाई अधिकार सम्पन्न बनाउन विगतमा भूमिका खेलेका कारण देशव्यापी लहर आएको विचार व्यक्त गर्नुभयो ।
उहाँले राष्ट्रिय स्वाधीनता र स्वाभिमानका लागि एमाले नेतृत्वको अघिल्लो सरकारले घुँडा नटेकेकाले पनि यसप्रति जनताको समर्थन आएको र यसबाट तर्सिएर सरकारमा रहेका दलबीच चुनावी तालमेल भएको तर्क गर्नुभयो ।
कामपामा पदयात्रा
एमालेले काठमाडाँै महानगरपालिकाको चुनावी प्रचारप्रसार अभियानको अन्तिम दिन आज विभिन्न वडामा चुनावी पदयात्रा निकालेको छ ।
एमालेले कामपा वडा नं २, ४ र ५ वडामा पदयात्रा निकालेको ३ नं प्रदेशका सदस्य नारायण सिलवालले जानकारी गराउनुभयो । तीनै वडामा निकालिएको पदयात्रामा एमालेबाट प्रमुखका उम्मेदवार विद्यासुन्दर शाक्य सहभागी हुँदै महानगरलाई व्यवस्थित बनाउन आफ्नो जित आवश्यक रहेकाले जिताउन आग्रह गर्नुभएको थियो ।
