गोरखाको पस्लाङका मतदातासँग स्थानीय तहको निर्वाचनका लागि भोट दिएर जिताउन घरदैलो गर्दै नयाँ शक्ति पार्टी नेपालका संयोजक डा. बाबुराम भट्टराई । तस्बिर ः प्रशन्न पोखरेल, गोरखा, रासस
पस्लाङ (गोरखा), २६ वैशाख । नयाँ शक्ति नेपाल पार्टीका संयोजक डा बाबुराम भट्टराईले संविधानअनुसार आगामी जेठ १५ गते नै बजेट ल्याउनुपर्ने र त्यसअघि स्थानीय तहको दोस्रो चरणको निर्वाचन गराउनुपर्ने बताउनुभएको छ ।
मतदातासँग मत माग्न गोरखा नगरपालिकाको पस्लाङ पुग्नुभएका डा भट्टराईले आज पत्रकारसँग कुरा गर्दै भागबन्डाको राजनीतिले गर्दा देश भाँडभैलोतर्फ गएको र लोकतन्त्रलाई तहसनहस पार्ने काम भइरहेको आरोप लगाउनुभयो ।
निर्वाचनलाई स्वतन्त्र, निष्पक्ष बनाउनुपर्नेमा सरकार र सरकारमा रहेका दल नै गुण्डागर्दी र अपराधीकरणमा उत्रेको दोषारोपण पनि उहाँले गर्नुभयो ।
अर्काे प्रसङ्गमा उहाँले उपेन्द्र यादव नेतृत्वको सङ्घीय समाजवादी फोरम नेपाल र नयाँ शक्तिबीच स्थानीय तहको पहिलो चरणको निर्वाचनपछि एकीकरणबारे छलफल हुने जानकारी दिनुभयो ।
