नयाँ संविधान संशोधन विधेयक दर्ता

कानुन, न्याय तथा संसदीय मामिलामन्त्री अजयशङ्कर नायकले सरकारले ल्याएको संविधान संशोधन नयाँ प्रस्ताव सबैको सहमतिमा पारित हुने दाबी गर्नुभएको छ ।

रिपोर्टर्स क्लबले आज यहाँ गरेको साक्षात्कारमा उहाँले नयाँ संशोधन प्रस्ताव एमाले र मधेसी मोर्चा दुवैको सहमतिमा ल्याइएको जिकिर गर्नुभयो ।

“पुरानो संशोधन प्रस्ताव फिर्ता भएको छ । नयाँ प्रस्ताव वैशाख ७ गते संसद्मा टेबल हुनेछ । प्रस्तावबारे मधेसी मोर्चासँग पनि ठोस सहमति भएको छ । उहाँहरुका सबै मागको सम्बोधन हुनेछ”– मन्त्री नायकले भन्नुभयो ।

प्रमुख प्रतिपक्षी दल नेकपा (एमाले)का प्रभावशाली नेता एवम् पूर्वमन्त्री रघुवीर महासेठले सरकारले ल्याएको नयाँ संशोधन प्रस्ताव पहिलेकोभन्दा पनि खतरापूर्ण भएको आरोप लगाउनुभयो ।

मधेसी मोर्चाका नेता लक्ष्मणलाल कर्णले सरकारले मोर्चासँग छलफल नगरिकनै पहिले पेस भएकोे प्रस्ताव फिर्ता लिई नयाँ प्रस्ताव ल्याउन लागेको बताउनुभयो ।