बिबिसी, रोयटरसंग नेपाली पर्यटनको प्रचार गर्न सम्झौता

काठमाडौँ, २१ चैत । नेपालको पर्यटनलाई अन्तर्राष्ट्रिय बजारमा प्रचारप्रसार गरी बढी भन्दा बढी विदेशी पर्यटक भित्र्याउने उद्देश्यले नेपाल पर्यटन बोर्डले चर्चित अन्तर्राष्ट्रियस्तरका सञ्चार माध्यमसँग साझेदारी अघि बढाएको छ ।

भूकम्पपछिको पर्यटनलाई विश्वभर सकारात्मक सन्देश प्रवाह गरी पर्यटन प्रवद्र्धन गर्न बोर्डले बिबिसी, रोयटर र ट्रिपएडभाइजरसँग साझेदारी गरेको हो । ती संस्थासँग आज यहाँ आयोजित एक कार्यक्रमबीच छुट्टाछुट्टै दुई पक्षीय सम्झौता गरिएको छ ।

संस्कृति, पर्यटन तथा नागरिक उड्डयन मन्त्रालयका सचिव शङ्करप्रसाद अधिकारीको उपस्थितिमा बोर्डका प्रमुख कार्यकारी अधिकृत दीपकराज जोशीले बिबिसीका दक्षिण एसिया बजार निर्देशक विकास भाट्नागर, रोयटरका बजार प्रवन्धक एस एन भादुरी र ट्रिप एडभाइजरका दक्षिण एसिया बजार निर्देशक भरतनाथ पालसँग सम्झौता पत्रमा हस्ताक्षर गर्नुभयो ।

सम्झौता अनुसार प्रचारप्रसारका लागि बिबिसीसँग छ महिनाका लागि छ लाख ८० हजार, ट्रिप एडभाइजरसँग एक वर्षका लागि दुई लाख ५० हजार र रोयटरसँग ७५ हजार अमेरिकी डलर बोर्डले खर्चनेछ । तीनवटै संस्थाको निश्चित अवधिमा मूल्याङ्कन हेरेर थप कार्यक्रम अघि बढाइनेछ ।

तीनवटै मिडियाले नेपालको पर्यटन प्रवद्र्धनका लागि महत्वपूर्ण पर्यटकीय गन्तव्य, पर्वतारोहण, पदयात्रा, धार्मिकस्थल, स्थानीय रहनसहन, महत्वपूर्ण चाडपर्व आदिबारे अनुसन्धानमूलक सामग्री, भिडियो क्लिप, तस्बिर, गन्तव्य विवरणात्मक सम्प्रेषण, प्रसारण र प्रवद्र्धन गर्नेछन् ।

तत्कालै हिमाल आरोहणको मौसम भएकाले सगरमाथा, नजिकिएको बुद्ध जयन्तीलगायतबारे सन्देशमुलक विषयवस्तु राखिने बताइएको छ । ट्रिप एडभाइजरले मङगलबारदेखि, बिबिसीले १४ दिनपछि र रोयटरले मे महिनाबाटै नेपालको पर्यटन सन्दर्भका सामग्री राख्ने बोर्डले जनाएको छ ।

सो अवसरमा पर्यटन सचिव अधिकारीले नेपालको पर्यटनलाई अन्तर्राष्ट्रिय बजारमा प्रवद्र्धन गरी पर्यटकलाई आकर्षित गर्न सम्झौताले महत्वपूर्ण प्रभाव पर्ने बताउनुभयो । नेपालको पर्यटनको अथाह सम्भावना रहेपनि ‘हवाई सम्पर्क’, भौतिक पूर्वाधार तथा पर्यटनयोग्य वस्तुको विकास र गन्तव्य प्रवद्र्धन नहुँदा पर्यटन क्षेत्रको विकास हुन नसकेको भन्दै ती क्षेत्रमा प्रभावकारी कार्यक्रम अघि बढाइने बताउनुभयो ।

पर्यटन प्रवद्र्धनसँगै आफ्ना सेवामा गुणस्तर कायम गरी नयाँ गन्तव्य प्रवद्र्धनमा सरकार र निजी क्षेत्रले ध्यान दिनुपर्नेमा उहाँको जोड थियो । बोर्डका सिइओ जोशीले भूकम्पपछिको नेपालको पर्यटनबारे संसारभर सकारात्मक सन्देश प्रभाव होस् भन्ने उद्देश्यले तीन अन्तर्राष्ट्रिय संस्थासँग साझेदारी अघि बढाइएको उल्लेख गर्नुभयो ।

उहाँका अनुसार बिबिसीबाट एसिया र युरोपका विभिन्न क्षेत्रमा नेपालको एक दिनमा करिब छ देखि १२ पटकसम्म नेपालको ३० सेकेन्डको भिडियो क्लिप प्रशारण हुनेछ भने बिबिसी ब्लगको साइटमा थुप्रै सामग्री राखिनेछ, अर्को रोयटरको नेटवर्कमा पनि पर्यटनको सकारात्मक र चाखलाग्दा सामग्री राखिने र ट्रिप एडभाइजरलाई नेपालको पर्यटन प्रवद्र्धनमा अधिक प्रयोग गर्ने समझदारी भएको छ ।

यो सम्झौता नेपालको इतिहासमै पहिलो पटक भएको र यसले पर्यटन प्रवद्र्धनमा महत्वपूर्ण प्रभाव पार्ने उहाँले बताउनुभयो । यसअघि बिबिसी र सिएनएनमा बोर्डले अन्तर्राष्ट्रिय पर्यटन प्रवद्र्धनका लागि विज्ञापन गरेको थियो ।

रोयटरका बजार प्रबन्धक भादुरीले नेपालको अर्थतन्त्रलाई अघि बढाउने महत्वपूर्ण आधार पर्यटन प्रवद्र्धनमा साझेदारी गर्न पाउँदा उत्साहित भएको बताउँदै यसले अन्तर्राष्ट्रिय बजारमा सकारात्मक सन्देश प्रवाह गर्न सहयोग पुग्ने विश्वास व्यक्त गर्नुभयो ।

ट्रिप एडभाइजरका बजार निर्देशक पालले आरोहण, पदयात्रा, धार्मिक र वन्यजन्तु अवलोकनका लागि नेपाल विश्वकै उत्कृष्ट गन्तव्य रहेको भन्दै यसको प्रवद्र्धनमा सहभागीता जनाउन पाउँदा खुसी व्यक्त गर्नुभयो ।

बिबिसीका बजार निर्देशक भाट्नागरले विश्वबजारमा नेपालको पर्यटनको सम्भावना र आगामी प्रवद्र्धनका विषयवस्तुबारे प्रस्तुति गर्नुभएको थियो । सरकार र निजी क्षेत्रको साझेदारीमा विभिन्न अभियान चलाएर पर्यटकको सङ्ख्या क्रमशः वृद्धि हुँदै गएकोमा पछिल्लो भूकम्प र नाकाबन्दीका कारण पर्यटकको आवागमन कम हुन पुगेको थियो ।

बोर्डको विवरण अनुसार सन् २०१६ मा सातलाख २९ हजार विदेशी पर्यटकले नेपालको भ्रमण गरेका छन् । सन् २०१५ मा पाँचलाख ५४ हजारले भ्रमण गरेका थिए । सन् २०१४ मा सात लाख ९० हजार र २०१३ मा सातलाख ९७ हजारले भ्रमण गरेका थिए । भूकम्प र नाकाबन्दीका कारण सन् २०१५मा पर्यटकको सङ्ख्या घटेको हो ।

नेपालले विगतमा ‘भिजिट नेपाल–१९९८, पर्यटन भ्रमण वर्ष–२०११ र पछिल्लो घुमफिर वर्ष–२०१७, जस्ता अभियान चलाएको छ । सरकारले ‘भिजन–२०२०’ मा २० लाख पर्यटक भित्र्याउने लक्ष्य लिएको छ ।