बुधबार, कार्तिक १२ २०७७ | Wed, October 28, 2020
नेपालको समय: २०:४२ | UK Time: 14:57

त्रिपक्षीय वार्ताका लागि ‘आलटाल’ गरियो भन्दै दूतावाससंग रिसाए भूपू गोर्खा

वीनेपाली
२०७३ फागुन २० गते १४:०७

लन्डन । लन्डनस्थित नेपाली दूतावासले त्रिपक्षीय वार्ताका लागि ‘आलटाल’ गरेको भन्दै भूपू गोर्खा दूतावासप्रति आक्रोशित भएका छन् । गोर्खा सत्याग्रह संयुक्त संघर्ष समितिको बिहीबार बसेको बैठकमा भूपू गोर्खाले आफूहरुलाई १५ मार्चसम्म लिखित प्रतिवद्धता नआए दूतावासमा हुन लागेको ‘बेलायत नेपाल कुटनीतिक सम्वन्ध स्थापनाको दुई सय वर्ष गांठ समापन समारोह’ अवरुद्ध बनाउने चेतावनी समेत दिएका छन् । ‘हामीलाई आज आज, भोलि भोलि भन्दै यतिका दिन झुलाइयो’, समितिका अभियान निर्देशक ज्ञानराज राईले प्रश्न गरे, ‘भूपू गोर्खाहरु भोक भोकै छन् । दुःखले छटपटाइरहेका बेला हामीलाई वेवास्ता गरेर दूतावास कसरी सेलिब्रेसनमा रमाउन सक्छ ?’

राईले नेपाल सरकारले लन्डनस्थित दूतावासलाई जिम्मेवारी दिइसकेर पनि राजदूतले गम्भीर रुपमा नलिएको आरोप लगाए । आफ्ना मागलाई गम्भीर रुपमा नलिइए समारोहका बेला हजारौं भूपू गोर्खा दूतावास प्रांगणमा भोकै सुतिदिने चेतावनी समेत राईले दिएका छन् । धेरै दिन लम्बिए आक्रोशित भूपू गोर्खाहरुलाई समितिले रोक्न नसक्ने समेत बताएको छ । दूतावासले मार्च अन्तिम साता त्रिपक्षीय वार्ता हुने आश्वासन दिएपनि भूपू गोर्खा त्यसमा आश्वस्त हुन सकेका छैनन् । दूतावास र सत्याग्रह समितिबीच आगामी ८ मार्चमा बैठक बस्ने तयारी छ ।

समितिले बेलायती रक्षा मन्त्रालयले आफूहरुलाई पटक पटक वार्तामा बोलाएपनि त्यसमा नेपाल सरकारको समेत सहभागिता 
हुनुपर्ने अडान राख्दै वार्ता वहिष्कार गरिएको जिकिर गर्दै आएको छ ।

समितिले अवकास पाए देखि गोरा सरह समान पेन्सन, रिडन्डेन्सीमा पठाइएकालाई क्षतिपूर्तिसहित ज्याकी डोयल प्राइस प्रतिवेदनले ऐतिहासिक अन्याय भन्दै सरकारलाई दिन सिफारिस गरेका १७ भन्दा बढि जायज मुद्दा सम्वोधन गरिनुपर्ने माग राखेको छ ।

प्रतिक्रिया

सम्बन्धित सामाग्री

फेसबुक