मंगलबार, असोज १३ २०७७ | Tue, September 29, 2020
नेपालको समय: ०९:०६ | UK Time: 04:21

प्रधानमन्त्री निवासमा निर्वाचन तयारीबारे छलफल

वीनेपाली
२०७३ फागुन ७ गते १९:३५

काठमाडौँ, ७ फागुन । नेकपा (माओवादी केन्द्र) ले स्थानीय तहको निर्वाचनको तयारीका बारेमा छलफल गरेको छ ।

प्रधानमन्त्री निवास बालुवाटारमा आज बसेको हेडक्वाटरको बैठकमा निर्वाचनका विषयमा भएका तयारी, पार्टीको आन्तरिक गतिविधि तथा अवस्थाका बारेमा छलफल भएको हो ।

पार्टी अध्यक्ष तथा प्रधानमन्त्री पुष्पकमल दाहाल ‘प्रचण्ड’को अध्यक्षतामा बसेको बैठकले समसामयिक राजनीति र माओवादी केन्द्रको सङ्गठनात्मक विषयबारे समीक्षा गरेको छ ।

बैठकमा प्रधानमन्त्रीले समसामयिक राजनीतिक परिस्थिति, स्थानीय तहको निर्वाचनबारे सरकारले गरेको तयारी र राजनीतिक दलहरुसँग भएको संवादबारे बैठकलाई जानकारी गराउनुभएको थियो ।

बैठकमा हेडक्वार्टर सदस्यहरुले पार्टी आन्तरिक सङ्गठनात्मक विषय, संविधान संशोधनको प्रक्रिया र स्थानीय तहको निर्वाचनबारे आफ्ना सुझावहरु राख्नु भएको थियो ।

यस्तै बैठकले पार्टी सदस्यता नवीकरणको काम सम्पन्न गर्ने, पार्टीका स्थानीय तहका समितिहरुको सम्मेलन सम्पन्न गर्ने, एकता गर्न बाँकी रहेका मोर्चा, जनवर्गीय सङ्गठन र विभागहरुको एकता सम्पन्न गर्ने र निर्वाचनलाई केन्द्रित गरेर सङ्गठनात्मक कामलाई अघि बढाउने निर्णय गरेको छ ।

राजनीतिक परिस्थितिबारे समीक्षा गर्दै बैठकले स्थानीय तहको निर्वाचन निर्विकल्प भएको निष्कर्ष निकालेको छ । हेडक्वार्टर सदस्यहरुले अन्तिमपटक सत्तारुढ नेपाली काँग्रेस, मधेसी मोर्चा र निर्वाचन आयोगसँग पनि छलफल गरेर एक दुई दिनभित्रै निर्वाचनको मिति घोषणा गर्न सरकारलाई सुझाव दिएको हेडक्वार्टर सदस्य तथा प्रधानमन्त्रीका प्रमुख राजनीतिक सल्लाहकार चक्रपाणि खनालले जानकारी दिनुभयो ।

बैठक पुनः बस्ने गरी स्थगित भएको जनाइएको छ ।

प्रतिक्रिया

सम्बन्धित सामाग्री

फेसबुक