शनिबार, कार्तिक १५ २०७७ | Sat, October 31, 2020
नेपालको समय: १३:३२ | UK Time: 07:47

कर्मचारीतन्त्रमा देखिएको भ्रष्टाचार रोक्न अभियान थालिने

वीनेपाली
२०७३ माघ २० गते ०:३६

काठमाडौँ, १९ माघ । नेपाल निजामती कर्मचारी सङ्गठनले कर्मचारीतन्त्रमा देखिएको भ्रष्टाचार रोक्न अभियान सञ्चालन गर्ने भएको छ ।

पहिलो बैठकको निर्णय सार्वजनिक गर्न आयोजित पत्रकारसम्मेलनमा सङ्गठनका अध्यक्ष केदारप्रसाद देवकोटाले सबै मन्त्रालय र विभागमा भ्रष्टाचार न्यूनीकरणका लागि अभियान सञ्चालन गर्ने जानकारी दिनुभयो ।

“हाम्रो चाहना पनि भ्रष्टाचारको दलदलमा कर्मचारी नपरून् भन्ने हो” उहाँले भन्नुभयो–“राष्ट्रसेवक कर्मचारीको काम ठगी होइन सेवा दिने हो । हामी सेवा दिन तयार छौँ ।” उहाँले भ्रष्टाचारमा संलग्न कर्मचारीलाई निलम्बन गर्न आफ्नो सङ्गठन सहयोग गर्न तयार रहेको पनि बताउनुभयो ।

बैठकले सङ्घीय प्रणालीमा कर्मचारी व्यवस्थापन गर्दा रोजाइ तथा छनोटलाई प्राथमिकतामा राख्नुपर्ने, योग्यता पुगेका कर्मचारीलाई प्रदेशमा समायोजन गर्दा एक तह बढुवाको अवसर दिनुपर्ने र हरेक तहमा लोकसेवामार्फत स्थायी कर्मचारी राख्नुपर्ने लगायतका माग गरेको छ ।

यसैगरी, कार्यालय समयभित्र निजामती कर्मचारीलाई कुनै बैठक र कार्यक्रममा सहभागी हुन नदिने पनि निर्णय गरेको छ ।

यसैबीच, बैठकले दशौँ राष्ट्रिय अधिवेशनबाट निर्वाचित पदाधिकारीको जिम्मेवारी बाँडफाँडसमेत गरेको छ ।

अध्यक्ष देवकोटाको अध्यक्षतामा २७ सदस्यीय सचिवालय, वरिष्ठ उपाध्यक्ष लेखनाथ कोइरालालाई गुनासो व्यवस्थापन, अनुगमन, मूल्याङ्कन र सहकारी विभाग, उपाध्यक्ष भवानी न्यौपानेलाई महिला विभाग, उपाध्यक्ष भागवत यादवलाई मधेसी समन्वय विभाग, उपाध्यक्ष ललिकबहादुर महर्जनलाई जनजाति समन्वय विभाग र उपाध्यक्ष बैकुण्ठ गुरागाईंलाई श्रेणीविहीन समन्वय विभागको जिम्मेवारी दिइएको छ ।

प्रतिक्रिया

सम्बन्धित सामाग्री

फेसबुक