लन्डन । फार्नबोरोस्थित गोर्खा प्यालेस रेष्टुरेन्टले ‘वेष्ट बाइट्स अफ दि इयर २०१६’ अवार्ड प्राप्त गरेको छ । स्थानीय न्यूज एण्ड मेलले आफ्ना लाखौं पाठकहरुको मतका आधारमा उक्त अवार्ड दिएको हो । पत्रिकाले उत्कृष्ट पब, क्याफे र रेष्टुरेन्ट गरि तीन वर्गीकरणमा तीनवर्ष यता अवार्ड प्रदान गर्दै आएको छ ।
उक्त पत्रिकाका फार्नबोरो, क्याम्बर्ली, फ्लीट, अल्डरसट, मिचेट, क्याम्बर्ली, गीलफोर्ड आदि क्षेत्रका पाठकहरुको मतका आधारमा अवार्ड प्रदान गरिएको रेष्टुरेन्ट सञ्चालक सूर्य गुरुङले जनाए । ति क्षेत्रमा करिब ५ सय र फार्नबोरोमा मात्र करिब ९० रेष्टुरेन्ट चालु छन् ।
उक्त रेष्टुरेन्टले सन २०१४- २०१५ मा पहिलो अवार्ड कार्यक्रममा सोही अवार्ड जितेको थियो ।
रेष्टुरेन्ट सञ्चालक गुरुङले अवार्ड दिने न्यू एण्ड मेल, ग्राहक, आफ्ना कर्मचारी र समस्त शुभचिन्तकहरुप्रति आभार व्यक्त गरेका छन् ।
गोर्खा प्यालेस् रेष्टुरेन्ट बेलायतकै प्रतिष्ठित ‘ब्रिटिश करि अवार्ड’ मा तीन पटक टप एकसयभित्र सर्ट लिस्टमा परिसकेको छ । सन् १९९९ देखि सञ्चालित उक्त रेष्टुरेन्ट सूर्य गुरुङले सन् २००४ मा किनेका थिए । त्यसयता सामाजिक उत्तरदायित्व अन्तर्गत रेष्टुरेन्टले हरेक वर्ष च्यारिटी गर्दै आएको छ । एक वर्ष नेपाल र एक वर्ष यूकेको च्यारिटीका लागि अर्थ संकलन गरिने गुरुङले जनाए ।
