अल्डरसटमा भएको कार दुर्घटनामा पूर्व गोरखाको निधन

लण्डन । अल्डरसटमा क्रिसमसको दिन बिहानै भएको कार दुर्घटनामा एक पूर्व गोरखा सैनिकको निधन भएको छ ।
आइतबार बिहान करिब ७ बजे ए ३३१ इष्ट बाउण्डमा आफूले चलाइरहेको कार अनियन्त्रित भई भएको दुर्घटनामा आर्मी नम्बर २११५८९२६ डब्ल्युओटु नारानप्रसाद गुरुङको निधन भएको हो ।
दुर्घटनामा घाइते उनकी श्रीमती खुशीमाया गुरुङलाई अहिले सेन्ट जर्ज अस्पताल लण्डनमा उपचार गरिँदैछ । मार्दीखोला समाज युकेका अध्यक्ष हीरामान गुरुङका अनुसार फोक्सो र करङमा चोट लागे पनि श्रीमती गुरुङ अहिले होसमा छिन् ।
अल्डरसटमा बसोबासरत गुरुङ दम्पती कामका लागि सर्रे अस्पताल गइरहेको बखतमा दुर्घटना भएको अध्यक्ष गुरुङले जानकारी दिए ।
दुर्घटनास्थल आइपुगेका पारामेडिक्सले गुरुङलाई घटनास्थलमै मृत घोषणा गरेका थिए ।  घटनास्थल पुगेका गुरुङका छोरा डा. दिनेश गुरुङले पनि बाउलाई बचाउन सकेनन् ।
करिब ६० वर्षीय गुरुङको नेपाल घर ल्वाङघलेल गाविस वडा नम्बर १ खोरामुख कास्की हो । उनी युकेमा छोरा डा. दिनेश, बुहारी दन्तचिकित्सक डा. इला र सासुका साथमा बस्दै आएका थिए ।
समाजसेवामा सक्रिय गुरुङ मार्दीखोला समाज युकेका सक्रिय सदस्य र आजिवन सदस्य पनि थिए ।