क्रिसमस इभमा बीग आइकन आलेले नचाए दर्शक

लन्डन । यतिखेर बेलायत भ्रमणमा रहेका छैटौं बीग आइकन साजन आले क्रिसमस इभमा एक कार्यक्रममा सहभागी भए ।

ग्रीनफोर्डस्थित गोर्खा स्पाइस वल्र्ड रेष्टुरेन्टमा आयोजित कार्यक्रममा आलेले नन स्टप दर्जन बढि नेपाली गीत गाएर दर्शक नचाए । क्रिसमस शुभकामना दिंदै फ्लोरमै प्रस्तुत भएका आलेले दर्शकहरुलाई धित मरुन्जेल नचाएका थिए । उनको गायनमा वान्स मोर भन्नेहरु कम थिएनन् । कम बोल्ने तर गायनमा खारिएका आलेलाई सम्मान गर्नेहरुको तांती नै लागेको थियो ।

कार्यक्रममा गायक आले र पोखरास्थित बीग एफएमका अध्यक्ष महेश भण्डारीलाई रेष्टुरेन्टका तर्फबाट सञ्चालक कृष्ण तुलाचनले सम्मान गरेका थिए । गीतकार समेत रहेका तुलाचनले पनि गीत गाए । नेपाली गीत संगीत रुचाउने तुलाचनले रेष्टुरेन्टमा कार्यक्रम गरि कलाकारहरुलाई सम्मान गर्दै आएका छन् । उनले छिट्टै नियमित लोक दोहोरी कार्यक्रम समेत राखिने जनाए ।

शुरुमा रेष्टुरेन्टमै कार्यरत दीपक थापा माइथाने, तुलाचन लगायतले राष्ट्रिय गानबाट कार्यक्रम शुरु गरेका थिए ।

काठमान्डूस्थित दि ब्रिटिश कलेज र युरोपको नेपालीपत्रको सहयोगमा बेलायत आएका आले र भण्डारी ५ जनवरी नेपाल फर्कने कार्यक्रम 
छ । बेलायत रहंदा आलेले विभिन्न सांगीतिक प्रस्तुति दिने छन् । हालसम्म उनले तीन ठाउंमा गायन प्रस्तुत गरिसके ।

तस्विरः शिव भण्डारी