काठमाडौँ, ७ पुस । एन्टार्टिका महादेशको सर्वोच्च शिखर भिन्सन मासिफमा नेपालको राष्ट्रिय झन्डा फहराइने भएको छ ।
एन्टार्टिका आरोहणको तयारीमा रहेका कीर्तिमानी विश्व पर्वतारोही सञ्जय पण्डित राष्ट्रिय झन्डासहित आरोहणमा जान लाग्नुभएको हो । उपराष्ट्रपति नन्दबहादुर पुनले आज लैनचौरस्थित निवासमा आरोही पण्डितलाई राष्ट्रिय झन्डा र हिमालमा प्रयोग हुने आइस एक्स (हिउँ बञ्चरो) प्रदान गर्नुभएको छ । आरोहणका लागि शुक्रबार अन्टार्टिका जाने पण्डितले बताउनुभयो ।
सो अवसरमा उपराष्ट्रपति पुनले आरोही पण्डितले नेपालको राष्ट्रिय झन्डा एन्टारटिकामा फहराउने कुरामा आफू विश्वस्त रहेको बताउनुभयो ।
पण्डितले एसियाको सगरमाथा, अफ्रिकाको किलिमञ्जरो, युरोपको सर्वोच्च शिखर एलब्रस, अमेरिकाको सर्वोच्च शिखर एकन्कागुवाको सफल आरोहण गरिसक्नुभएको छ ।
झन्डा हस्तान्तरण कार्यक्रममा सांसद हीराबहादुर केसी, राष्ट्रिय योजना आयोगका पूर्वउपाध्यक्ष डा गोविन्दराज पोखरेल, पूर्वसांसद वीरबहादुर सिंह र मुक्तिप्रसाद शर्मा, कतार एयरका देशीय व्यवस्थापक जयप्रकाश नेयर, राजनीतिज्ञ मणि थापा, विद्यार्थी नेता मनोजमणि आचार्य, युवा उद्यमी रघु पुरी, एनआरएन जापानका महासचिव अनुज थापालगायतले संयुक्त रुपमा बिदाइ एवम् शुभकामना व्यक्त गर्नुभएको थियो ।
अन्टार्टिका महादेशमा यसअघि तीन नेपाली बुटवलका भुवनसिंह विश्वकर्मा, रामबहादुर खत्री र अर्जुनकुमार थापा पुगेका थिए ।
