नेपाल र मङ्गोलियाबीच विभिन्न सम्झौता

काठमाडौँ, ४ पुस । नेपाल र मङ्गोलियाबीच सोमबार विभिन्न क्षेत्रमा सम्झौता र सहमति भएको छ ।

परराष्ट्रमन्त्री डा प्रकाशशरण महत र मङ्गोलियाका विदेशमन्त्री चेन्द मुख अर्गिलबीच परराष्ट्र मन्त्रालयमा आज बिहान सम्झौता पत्रमा हस्ताक्षर भएको हो ।

मन्त्री अर्गिल नेपालको दुईदिने औपचारिक भ्रमणका लागि आइतबार काठमाडौँ आउनभुएको हो ।

दुई देशबीच भएको सम्झौताबमोजिम अबदेखि नेपाल र मङ्गोलियाका कूटनीतिक र सरकारी (विशेष राहादानी) बाहक नागरिकलाई भ्रमणका लागि प्रवेशाज्ञा नचाहिने भएको छ ।

त्यसैगरी मङ्गोलिया सरकारले विश्वका सबै भूपरिवेष्ठित राष्ट्रको अध्ययन एवम् सहयोगका लागि एक अन्तर्राष्ट्रियस्तरको थिंक ट्याङ्क स्थापना गर्न गरेको प्रस्तावलाई नेपालले स्वीकार गरेको छ ।

यस्तो समूहमार्फत भूपरिवेष्ठित देशहरुका समस्याका साथै साझा चासो र सरोकारका बारेमा अध्ययन गरी अन्तर्राष्ट्रिय समुदायमा साझा धारणा निर्माणका लागि पनि सहयोग पुरयाउन सक्दछ ।

त्यस्तै नेपाल र मङ्गोलियाका बीचमा आपसी चासोका बारेमा गरिने द्विपक्षीय छलफलका लागि परराष्ट्र मन्त्रालयबीचमा एक संयुक्त परामर्श संयन्त्र निर्माण गर्ने र उक्त संयन्त्रको बैठक दुवै पक्षलाई अनुकुल हुनेगरी नियमित रुपमा आयोजन गर्ने बारेमा सहमति भएको छ ।

मङ्गोलिया अधिकांश बौद्ध धर्मावलम्बीको देश भएकाले गौतम बुद्धको जन्मस्थल लुम्बिनीमा बौद्धगुम्बा निर्माणका लागि नेपालले गरेको आग्रहलाई मङ्गोलियाले सकारात्मक रुपमा लिएको र प्रक्रिया अघि बढाउने बताएको हो ।

यसैगरी यी दुई देशका बीचमा जनस्तरको सम्बन्धलाई थप बलियो बनाउन र एक अर्काका मुलुकको बारेमा बुझाईका दायरा फराकिलो बनाउन दुवै देशका पत्रकार, सांसद तथा संस्कृतिक भ्रमण आदानप्रदान गर्ने पनि सहमति भएको छ ।

परराष्ट्र मन्त्रालयमा भएको द्विपक्षीय वार्ताका क्रममा भएको समझदारीबमोजिम नेपाल संयुक्त राष्ट्रसङ्घमा शान्ति स्थापनामा विगत लामो समयदेखि महत्वपूर्ण योगदान पुरयाउँदै आएको र हाल सैन्य योगदान गर्ने विश्वको छैटौँ ठूलो देश भएकाले नेपालको यो अनुभवबाट लाभान्वित हुने अपेक्षा व्यक्त भएको छ ।

मङ्गोलियाका विदेशमन्त्रीसहितको प्रतिनिमण्डलसँग भएको द्विपक्षीय वार्तामा परराष्ट्र सचिव शंकरदास बैरागीसहित परराष्ट्र मन्त्रालयका अधिकारीहरु सहभागी हुनुहुन्थ्यो ।

उक्त द्विपक्षीय वार्तापछि परराष्ट्र मन्त्री डा महतले दुई देशबीच महत्वपूर्ण विषयमा सहमति भएको सञ्चारकर्मीलाई जानकारी गराउँदै हालका लागि सुरु गरिएको प्रवेशाज्ञा नलाग्ने प्रावधान भविष्यमा नेपाल र मङ्गोलियाका सबै नागरिकका लागि पनि गर्न सकिने गरी सहज बनाइने बताउनुभयो । यसले जनस्तरमा सम्बन्ध विस्तारका लागि सघाउ पुग्ने धारणा उहाँले व्यक्त गर्नुभयो ।

मन्त्री डा महतले दुवै देशका बीचमा जनस्तरमा सम्पर्क अभिवृद्धिका साथै भूपरिवेष्ठित देशको हित र साझा चासोका बारेमा गठन हुने थिंक ट्याङ्कले नेपालजस्तो भूपरिवेष्ठित देशका लागि पनि फाइदा पुग्ने बताउनुभयो ।

यसैबीच आजै परराष्ट्रमन्त्री डा महतले मंगोलियाका विदेशमन्त्रीको सम्मानमा दिवाभोजको आयोजना पनि गर्नुभयो ।