संविधान संशोधन प्रस्ताव फिर्ता हुन्न – प्रधानमन्त्री

विराटनगर, ३ पुस । प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले संविधान संशोधनको प्रस्ताव फिर्ता नहुने स्पष्ट पार्नुभएको छ ।

नेकपा (माओवादी केन्द्र) प्रदेश नं १ का अगुवा कार्यकर्ताको प्रशिक्षण कार्यक्रमलाई सम्बोधन गर्दै उहाँले महिनौँ संसद् अवरुद्ध गरे पनि संसद्मा दर्ता भएको संविधान संशोधन प्रस्ताव फिर्ता नगरिने बताउनुभएको छ ।

उहाँले एमालेले सो प्रस्ताव फिर्ता गराउने बहानामा संसद् र सडक आन्दोलन गरेर मुलुकलाई सङ्कटमा पार्न खोजेको बताउनुभयो ।

जनयुद्धको उपलब्धिस्वरुप प्राप्त सङ्घीयता, गणतन्त्र, समावेशी, समानुपातिक, धर्म निरपेक्षता, सामाजिक न्याय र मौलिक अधिकारका विरुद्धमा एमालेले षड्यन्त्र गरिरहेको भन्नुहुँदै उहाँले त्यसकाविरुद्ध डटेर सामना गर्नेतर्फ अग्रसर हुन कार्यकर्तालाई निर्देशन दिनुभयो ।

उहाँले माओवादी विभाजित र कमजोर हुँदै गएको फाइदा उठाएर प्रतिगामी चलखेलमा उत्रिएको उल्लेख गर्दै उहाँले कार्यकर्ता नेतृत्वलाई बलियो बनाउनतर्फ सक्रिय भएर जुट्न आग्रह गर्नुभयो ।