सुख्खा बन्दरगाह र महाकालीमा पुल निर्माण यसै आवदेखि

भीमदत्तनगर, २२ मङ्सिर । प्रधानमन्त्री पुष्पकमल दाहाल ‘प्रचण्ड’ले दोधारा–चाँदनीमा सुख्खा बन्दरगाह र पुल निर्माण कार्य यसै आर्थिक वर्षदेखि सुरु गरिने बताउनुभएको छ ।

आज दाङ र धनगढी हुँदै कञ्चनपुरको दोधारा–चाँदनी पुग्नुभएका प्रधानमन्त्री दाहालले विस्तृत परियोजना प्रतिवेदन (डिपिआर) तयार गरेर सुख्खा बन्दरगाहको निर्माण सुरु गर्ने प्रतिवद्धता व्यक्त गर्नुभयो । महाकाली नदीमा चार लेनको पक्की पुल निर्माण कार्यलाई सरकारले उच्च प्राथमिकताका साथ अघि बढाएको जानकारी दिँदै प्रधानमन्त्री दाहालले पुल निर्माणबारे भारतीय प्रधानमन्त्रीसँग आफूले कुरा गरिसकेको बताउनुभयो ।

सुदूरपश्चिम भेगमा औद्योगिक क्षेत्र विस्तारका लागि सरकार जुटिरहेको पनि उहाँले बताउनुभयो । उहाँले सुदूरपश्चिममा शिक्षा, स्वास्थ्य लगायतका जनसरोकारका विषयमा सरकार गम्भीर रहेको र त्यसका लागि सक्दो पहल गर्ने आश्वासन दिनुभयो ।

महाकालीपारिको दोधारा–चाँदनी नगरपालिका–७ मा निर्माणका लागि प्रस्तावित सुख्खा बन्दरगाह क्षेत्रको स्थलगत निरीक्षणपछि प्रधानमन्त्री दाहाल आजै साँझ धनगढी फर्किनुभएको छ । उहाँसँगै नेकपा (माओवादी केन्द्र)का नेताद्वय शक्ति वस्नेत र लेखराज भट्ट हुनुहुन्थ्यो ।