नेपाल हाउसका लागि पहिलो चरणमा जग्गा खरिदको तयारी

लन्डन । गैर आवासीय नेपाली संघ बेलायत (एनआरएनए यूके) ले आफ्नो महत्वाकांक्षी नेपाल हाउस प्रोजेक्टका लागि पहिलो चरणमा जग्गा खरिद गर्ने भएको छ । एकै चोटी भवन निर्माण थाल्न सहज नभएकाले ग्रीनबेल्ट एरियातिर जग्गा किनेपछि अरु निर्माण प्रक्रिया शुरु 
गर्ने निष्कर्षमा संघ पुगेको हो । संघका पदाधिकारी शुक्रबार वकिङ गएर जग्गा समेत अवलोकन गरेका थिए । जग्गा आफैंले किनेर प्लानिङ परमिसन प्रक्रियापछि पनि भवन निर्माण गर्दा सस्तो पर्ने ठम्याइ संघको छ ।

यही क्रममा एनआरएनए यूकेले शनिबार फार्नबोरोस्थित गोर्खा प्यालेस रेष्टुरेन्टमा बेलायतका करिब दुई दर्जन संघसंस्थाका प्रतिनिधिसंग छलफल गरेको छ । केही दिन अघि दूतावास भवन पुगेर नेपाल हाउस प्रोजेक्टका लागि राजदूतसंग सहयोग मागेको संघले नेपाल हाउस अभियानकै क्रममा फार्नबोरोमा संघसंस्थाका प्रतिनिधिसंग छलफल गरेको हो । छलफलमा एनआरएनए यूके अध्यक्ष मुछेत्र गुरुङ, महासचिव विजयविक्रम लिंग्देन, एनआरएनए यूके 
पूर्व अध्यक्ष सूर्य गुरुङले नेपाल हाउस प्रोजेक्टको अवधारणा, यसको दीर्घकालिन फाइदा, लगानी जुटाउन चुनौती र अन्य विभिन्न आयामबारे प्रष्टयाएका थिए ।

छलफलका सहभागीले नेपाल हाउस प्रोजेक्टबारे जनस्तर र क्षेत्रगत रुपमा अझ व्यापक प्रचार प्रसार अभियान थालिनुपर्ने, यसको स्पष्ट भिजन प्रस्तुत गरिनुपर्ने, तह तप्का हेरेर चरण चरणमा कोषवृद्धि अभियान थालनी गर्नुपर्ने, संघसंस्था र आम बेलायतवासी नेपालीको मन जित्न पारदर्शीताको विश्वास दिलाउनुपर्ने आदि सुझाव दिएका थिए । केहीले नेपाल हाउसको चन्दा संकलनका लागि अनलाइन 
व्यवस्था गर्न सके बेलायतमात्र होइन, विश्वभरबाट आर्थिक संकलन हुने सल्लाह दिए । कतिपय सहभागीले संघसंस्था, व्यापारिक घराना र व्यक्तिहरुसम्म एनआरएनए यूकेको पहुंच अझ व्यापक हुनुपर्नेमा जोड दिएका थिए ।

कार्यक्रममा एनआरएन युरोप संयोजक कुल अचार्य, सोसाइटी अफ नेपलिज इन्जिनियर्स यूके अध्यक्ष घनश्याम पौडेल, व्यवसायी कमल भण्डारी लगायतले आ आफ्ना सुझाव दिए ।

नेपाली कला, संस्कृति झल्काउने उद्देश्यसहित करिब अढाइ मिलियन पाउण्ड लागतमा बनाउन लागिएको नेपाल हाउसमा ६ सय जना अट्ने सम्मेलन कक्ष, लाइब्रेरी, क्याफे, सोभिनियर सप, गोर्खा संग्रहालय, बैठक कक्ष, दुई सय कार र दुई वटा बसका लागि पार्किङ व्यवस्था, डबल बेडरुमको १६ अतिथी आवास कोठा आदि राख्ने लक्ष्य लिइएको छ । एनआरएनए यूके अध्यक्ष मुछेत्र गुरुङले हालसम्म एक लाख ७५ हजार पाउण्डको प्रतिवद्धता आइसकेको जानकारी दिए ।