लन्डन । एनआरएनए यूके प्रतिनिधिमण्डलले बुधबार लन्डनस्थित नेपाली राजदूत डा. दुर्गाबहादुर सुवेदीसंग भेट गरि नेपाल हाउस प्रोजेक्टबारे छलफल गरेको छ । एनआरएनए यूके अध्यक्ष मुछेत्र गुरुङको नेतृत्वमा दूतावास गएको टोलीमा उपाध्यक्षहरु योगकुमार फगामी, दासुराम पाण्डे र शान्ति थापा कुंवर, महासचिव विजयविक्रम लिंग्देन, सचिव फडिन्द्र भट्टराई, सहकोषाध्यक्ष ललित न्यौपाने, प्रवक्ता खुशी लिम्बु, युवा संयोजक हरि आचार्य, पूर्व सदस्यहरु राजेश पाठक, कृष्ण भट्टराई लगायत सहभागी थिए । भेटमा एनआरएनए यूके पदाधिकारीले दूतावासबाट पूर्ण सहयोगको अपेक्षा राखेका छन् ।
उक्त भेटमा अध्यक्ष गुरुङले राजदूत समक्ष एनआरएनए यूकेको महत्वाकांक्षी नेपाल हाउस प्रोजेक्टबारे अवगत गराए भने नेपाल हाउस प्रोजेक्टका टेक्निकल डाइरेक्टर राजेश पाठकले प्रोजेक्टको डिपिआर प्रस्तुत गरे । उपाध्यक्ष योगकुमार फगामीले प्रोजेक्टको उद्देश्यबारे बताए ।
राजदूत सुवेदीले एनआरएनए यूकेले ऐतिहासिक कार्य थालनी गर्न लागेकामा खुशी व्यक्त गर्दै दूतावासले नेपाल हाउस प्रोजेक्टका लागि आर्थिक सहयोग सम्भव नभएपनि नौतिक तथा अन्य सहयोग र समर्थन सधैं गर्ने आश्वासन दिएका थिए । उक्त नेपाल हाउसले बेलायत बस्ने नेपाली समुदायमा दीर्घकालिन सकारात्मक प्रभाव पार्ने सुवेदीको धारणा थियो । राजदूत सुवेदीले दूतावास र एनआरएनए यूकेबीच आपसी सहयोग र सहकार्य रहने आशा पनि व्यक्त गरे ।
उक्त अवसरमा राजदूत सुवेदीले नेपाल हाउस प्रोजेक्टकै लागि २६ डिसेम्बरमा अल्डरसटमा गर्न लागिएको च्यारिटी डिनरमा प्रमुख आतिथ्य स्वीकारे । उक्त च्यारिटीमा एनआरएनए आइसीसी अध्यक्ष शेष घलेलाई समेत निम्त्याउने योजना छ ।
उक्त भेटमा दूतावासका प्रवक्ता एवं उपनियोग प्रमुख शरदराज आरणले नेपाल हाउस प्रोजेक्टबारे इङल्याण्डका अन्यत्र शहरमा समेत जानकारी सभा राख्न सुझाए । प्रतिउत्तरमा प्रवक्ता खुशी लिम्बुले वेल्स, स्कटल्याण्ड र नर्दन आयरल्याण्डमा संघको क्षेत्रीय कमिटी गठन गरि अभियानलाई अझ सशक्त बनाइने योजना सुनाएका थिए ।
