बिहीबार, कार्तिक ६ २०७७ | Thu, October 22, 2020
नेपालको समय: ०६:०५ | UK Time: 01:20

लाइसेन्स फाराम भर्न अघिल्लो रातबाटै लाममा

वीनेपाली
२०७३ मंसिर ९ गते ७:५३

24112016010311licennse-1000x0-1000x0-1000x0

ललितपुर, ९ मङ्सिर । सवारी चालक अनुमतिपत्रको फाराम भर्न नसकेर बुधबार फर्किनुभएका सिन्धुपाल्चोकका रमेश तामाङ बिहीबार पनि फर्कन बाध्य हुनुभयो ।
बुधबार बिहान ७ बजे नै एकान्तकुना पुग्नुभएका उहाँ भीड देखेर फर्किनुभएको थियो तर बिहीबार पुनः कार्यालय पुग्दा त्यहाँका कर्मचारीले हलुका सवारी साधनको शुक्रबारसम्मको टोकन सकियो भनेपछि उहाँ फर्कन बाध्य हुनुभएको हो ।

बुधबार बाग्मती यातायात व्यवस्था कार्यालयमा नै भेटिनुभएका मकवानपुरका विकास चम्रेल भने फाराम भर्न पाएकामा दङ्ग देखिनुहुन्थ्यो । उहाँ राति ३ बजे नै एकान्तकुना पुग्नुभएको थियो । आफू पुग्दा राति ९, १० बजेदेखि बसेकाहरु भेटिएको चम्रेलले बताउनुभयो ।

कार्यालयले दुई महिनापछि बुधबारबाट चालक अनुमतिपत्रका लागि आवेदन फाराम लिन थालेको हो । लामो समयदेखि बन्द रहेको र अन्य अञ्चल कार्यालयले सेवा नदिएका कारण कार्यालयमा फाराम भर्नेको भीड लागेको छ । बुधबार मात्रै झन्डै चार हजार सेवाग्राही आइपुगेको कार्यालयमा कार्यरत कर्मचारीले बताएका छन् । एक दिनमा चारपाङ्ग्रे हलुका सवारी साधनको २०० र मोटरसाइकल ५०० गरेर कार्यालयले जम्मा ७००को फारम लिने गरेको छ ।

रामशाहपथस्थित नेसनल ट्रेडिङ सेन्टरमा सवारी जाँच हुने गरेकामा चाडपर्वका समय नेसनल ट्रेडिङले स्थान उपलब्ध नगराएका कारण दुई महिनासम्म सेवा दिन नसकिएको कार्यालयका प्रमुख तेजनारायण यादवले बताउनुभयो । फाराम भर्ने समयमा सधैँ भीड हुने भए पनि दुई महिनासम्म सेवा ठप्प हुँदा भीड धेरै गुणा बढेको छ । उहाँ भन्नुहुन्छ – “सामान्य हुन अझै केही समय लाग्न सक्छ ।”

लामो समयपछि चालक अनुमतिपत्र खुलेकाले प्रमुख यादव मङ्गलबार राति झन्डै ८ः३० बजेसम्म कार्यालयमा भोलिपल्टको तयारीका लागि बस्नुभएको थियो । बिहान आफू ६ः३० बजे पुग्दा नै धेरै सेवाग्राही आइसकेका थिए भन्दै उहाँले सेवाग्राही धेरै भए पनि कार्यालयले क्षमताअनुसार मात्रै सेवा दिन सक्छ भन्नुभयो ।
रातिबाट नै लाम लाग्न आएकालाई प्रहरीले हटाएको थियो । फाराम भर्न नपाएकाहरुले प्रवेशद्वार, पर्खाललगायतका स्थान तोडफोडसमेत गरेका छन् ।

कार्यालयले मोटरसाइकलको फाराम सङ्कलन सोमबारदेखि शुक्रबारसम्म गर्दै आएको छ । प्रत्येक दिन ५०० सेवाग्राहीले फाराम भर्न सक्छन् । हलुका सवारी साधनका लागि भने २०० जनाले फाराम भर्न पाउने व्यवस्था छ । आइतबार भारी सवारी साधन र स्कुटरका लागि चालक अनुमति पत्रको फाराम लिने गरिएको छ ।
भारी सवारी साधनका दलागि भने एक सयजनाले मात्र फाराम भर्न सक्ने व्यवस्था छ । जुनसुकै सवारी साधनको चालकले फाराम भरेको एक दिनपछि लिखित र दुई दिनपछि ट्रायल दिन सक्छन् ।

यातायात व्यवस्था कार्यालय, ललितपुरमा अहिले नमुनाका रुपमा स्मार्ट चालक अनुमतिपत्र वितरण भइरहेको छ ।

प्रतिक्रिया

सम्बन्धित सामाग्री

फेसबुक