बेलायत र अमेरिकाको नेपाली पत्रकारिता अनुभव साटासाट

लन्डन । अमेरिकामा क्रियाशिल एक जना व्यवसायिक पत्रकार किशोर पन्थीसंग बेलायतस्थित नेपाली पत्रकारहरुले नेपाली 
पत्रकारिता अनुभव साटासाट गरेका छन् ।

सोमबार सांझ माउन्टेन भ्यू रेष्टुरेन्ट ग्रीनवीच लन्डनमा आयोजित एक भेटघाटमा खसोखास साप्ताहिक सम्पादक पन्थीले अमेरिकामा नेपाली पत्रकारिताको वस्तुस्थिति, चुनौती र अवसरहरुबारे अनुभव सुनाए । पन्थीले सिमित श्रोत साधनबीच नेपाली पत्रकारिताले समुदायको अपेक्षा पुरा गर्न के कस्ता परिस्थिति सामना गर्नुपर्छ भन्नेबारे बताए । हफिङटन पोष्टमा ब्लग र लेख लेखिरहने पन्थीको अनुभवमा अमेरिका र बेलायतको नेपाली पत्रकारिताका चुनौती धेरै मिल्दो जुल्दो छन् । उनले विदेशमा नेपाली व्यवसायिक पत्रकारहरुको संख्या बढिरहेको उल्लेख गर्दै अब डायस्पोरिक मञ्च निर्माण गर्ने बेला आइसकेको धारणा समेत राखे ।

कार्यक्रममा नेपाल पत्रकार महासंघ बेलायतका अध्यक्ष एवं वी नेपाली डटकम सम्पादक नरेश खपांगीमगरले बेलायतको नेपाली पत्रकारिताका विभिन्न आयामबारे चर्चा गरे । बेलायतमा पूर्णकालिन पत्रकारिताबाट बांच्न सकिने अवस्था अझै नभएको उनको धारणा थियो ।

उक्त अवसरमा नेपाल पत्रकार महासंघ बेलायतका उपाध्यक्ष ध्रुवराज अर्याल, सचिव शिव भण्डारी, कान्तिपुरका बेलायत संवाददाता नवीन पोखरेल, सेतोपाटीका बेलायत संयोजक फडिन्द्र भट्टराईले पनि आ आफ्ना अनुभव साटेका थिए ।