हिथ्रो जाने सडक अवरुद्ध गर्ने १५ प्रदर्शनकारी पक्राउ

लन्डन । बेलायती प्रहरीले राजधानी लण्डनको हिथ्रो विमानस्थल जाने बाटो अवरुद्ध गर्ने १५ जना प्रदर्शनकारीलाई शनिबार पक्राउ गरिएको छ ।

विमानस्थलमा जाने बाटोमा जलवायु परिवर्तन नियन्त्रणका लागि जुटेका एक समूहले शनिबार सबेरै विमानस्थल जाने सडकमा सुतेर प्रदर्शन गरेपछि केही समय सडक अवरुद्ध बनेको थियो ।

उक्त समूहले हिथ्रो विमानस्थलको विस्तार गर्दा हजारौँ घरलाई क्षति पुग्ने र वातावरणमा समेत असर पर्ने भन्दै ‘पृथ्वीलाई जोगाऊँ, थप धावनमार्ग चाहिँदैन’ भन्ने नारा लेखिएका प्लेकार्डसहित उनीहरु प्रदर्शनमा उत्रिएका थिए ।

लन्डन महानगर प्रहरीले विमानस्थल जाने सडकमा प्रदर्शन गरी सडक अवरुद्ध गर्ने १५ जनालाई नियन्त्रणमा लिएको जनाएको छ ।

बेलायती सरकारले गत महिना हिथ्रोमा तेस्रो धावनमार्ग निर्माण गर्ने योजनालाई स्वीकृत गरेको थियो । स्थानीयवासी तथा केही वातावरण संरक्षणमा कार्यरत सङ्घसंस्थाले थप विमानस्थल निर्माण गर्दा वायु, आवाज प्रदूषण हुने र हजारौँ घरमा क्षति पुग्ने भन्दै विरोध जनाउँदै आएका छन् ।