लन्डन । नयां शक्ति नेपालका संयोजक पूर्व प्रधानमन्त्री डा. बाबुराम भट्टराईले आफूहरुलाई कतिपयले अझै हत्यारा र आतंककारी भन्ने गरेको गुनासो गरेका छन् ।
अन्तर्राष्ट्रिय नेपाली समाज बेलायतले आइतबार बेलायतस्थित अल्डरसटमा आयोजना गरेको अन्तरक्रिया कार्यक्रममा उनले प्रश्न गरे, ‘कतिपय साथीहरुले विषयान्तर गरेर मान्छे मारेकाबाट अब विकास कसरी सम्भव छ भन्नुहुन्छ । शहीदले बलिदान नदिइ विश्वमा कहां परिवर्तन र लोकतन्त्र आएको छ ? गणतन्त्रको फल मिठो लाग्ने, अनि हामीलाई हत्यारा र आतंककारी भन्न पाइन्छ ?’
क्रान्तिका बेला अप्रिय घट्ना स्वभाविक हुने जनाउंदै उनले सत्य निरुपण र मेलमिलाप आयोगमार्फत युद्धका बेला ज्यादती भएको भए आवश्यक प्रक्रिया गरेर दण्डित गर्न सुझाए ।
सयौं नेपाली सहभागी अन्तरक्रिया कार्यक्रममा भट्टराईले नेपालीहरुको एउटै भोक र तिर्खा विकास र समृद्धि भएको बताए । ‘जुनसुकै कोण, विचारधारा र पार्टीबाट भएपनि सबैको चासो र चिन्ता गरिवी, बेरोजगारी र पछौटेपन छिटो भन्दा छिटो अन्त्य गर्नुपर्छ भन्ने छ’, उनको धारणा थियो ।
बेलायतमा पनि गणतन्त्र आएको धेरै समय पछि १८ औं शताब्दीमा औद्योगिक क्रान्ति आएको स्मरण गर्दै उनले राजनीतिक क्रान्ति बिना आर्थिक क्रान्ति नहुने दृष्टान्त पेश गरे । ‘नेपालमा संघीय लोकतान्त्रिक गणतन्त्रको जगमा टेकेर अब विकास र समृद्धि सम्भव छ’, उनले भने, ‘यसैका लागि म माओवादीमा राम्रो सम्भावना हुंदाहुंदै एक्लै छाडेर नयां शक्तिमा लागें ।’ समृद्धिका लागि लोकतन्त्रको ढांचा अझ उन्नत गर्न जरुरी रहेको उनले बताए ।
नेपालमा शासकीय प्रणालीले स्थिर सरकार नदिने बताउंदै उनले राजनीतिक स्थिरता ल्याउन प्रत्यक्ष निर्वाचित कार्यकारी प्रणालीमा देश जानुपर्ने उनले बताए ।
अन्तर्राष्ट्रिय नेपाली समाज बेलायतका संयोजक भोला खनालको अध्यक्षतामा भएको उक्त कार्यक्रममा नयां शक्ति नेपाल आवद्ध कृषि वीद मदन राई र नवराज सुवेदीले पनि आफ्नो धारणा राखेका थिए ।
तस्विरः बीरेन्द्र श्रेष्ठ
