सनफ्रान्सिस्को (संयुक्त राज्य अमेरिका), २५ कात्तिक । अमेरिकामा डोनाल्ड ट्रम्प राष्ट्रपतिमा निर्वाचित भएपछि अमेरिकाभर विरोध प्रदर्शन शुरु भएको छ । विरोध प्रदर्शनका क्रममा पाँच जना घाइते भएका छन् ।
अमेरिकाको सियाटलमा बुधबार राति भएको आन्दोलनका क्रममा गोली प्राहारमा परी उनीहरु घाइते भएका हुन् ।
स्थानीय समयानुसार बेलुका बुधबार साँझ ७ बजेतिर ट्रम्प विरोधी प्रदर्शनकारीले पाइन र पिके सडकमा प्रदर्शन गरेको स्थानीय सञ्चार माध्यमले जनाएका छन् ।
सियाटल प्रहरीका उपप्रमुख रोबर्ट मर्नरले भने गोलीकाण्ड ट्रम्प विरोधी प्रदर्शनभन्दा व्यक्तिगत विवादको कारण भएको बताउनुभएको छ । घटनास्थलबाट एक जना पक्राउ परेका छन् ।
घाइते भएका पाँच जनामध्ये एक जना महिला र चार जना पुरुष रहेका छन् । उनीहरुलाई अस्पतालमा उपचार भइरहेको छ । उनीहरुमध्ये दुई जनाको अवस्था चिन्ताजनक रहेको सियाटल अग्नी नियन्त्रण विभागले ट्वीटरमार्फत जानकारी दिएको छ ।
घटनाका बारेमा प्रहरीले अनुसन्धान सुरु गरिसकेको र अपराधिले उन्मुक्ति नपाउने अधिकारीले जनाएका छन् । रासस, सिन्ह्वा
ओबामाले ट्रम्पलाई ह्वाइट हाउसमा आतिथ्य सत्कार गर्ने
वासिङ्गटन, २५ कात्तिक । अमेरिकामा नोभेम्बर ८ मा सम्पन्न भएको राष्ट्रपतीय निर्वाचनमा विजयी हुनुभएका ह्वाइट हाउसका भावी प्रमुखलाई वर्तमान राष्ट्रपति बाराक ओबामाले आतिथ्य सत्कारका लागि आजै आउन निमन्त्रणा गर्नुभएको छ ।
राष्ट्रपतीय निर्वाचनको परिणाम घोषणाको ४८ घण्टापछि शान्त र सहज तरीकाबाट सत्ता हस्तान्तरण गर्ने विषयमा वार्ता पनि गर्न ओबामाले ह्वाइट हाउसको ओभल अफिसमा ट्रम्पको आतिथ्य सत्कार कार्यक्रमको आयोजना गर्नुभएको हो ।
आगामी जनवरी २० का दिन हुन गइरहेको औपचारिक सत्ता हस्तान्तरण समारोह भन्दा अगाडि निवर्तमान र भावी राष्ट्रपतिकाबीच हुनलागेको यो भेटवार्तालाई स्थानीय सञ्चार माध्यमले अति महत्वका साथ प्रसारण गरिरहेका छन् ।
अमेरिकी इतिहासमा पहिलो महिला राष्ट्रपति बन्न चाहना राख्नु भएकी हिलारी क्लिन्टनलाई पराजित गर्दै अमेरिकी जनताले डोनाल्ड ट्रम्पलाई विजयी गराएकाले विश्व नै चकित परेको छ ।
यता, निर्वाचन परिणाम घोषणा भएपछि क्लिन्टनको हारबाट रुष्ट डेमोक्र्याट समर्थक जनता नवनिवार्चित, ७० वर्षीय राष्ट्रपतिको विरोधमा न्युयोर्कदेखि लसएन्जलससम्मका धेरै शहरमा जुलूस प्रदर्शनका साथै नाराबाजी र ठाउँठाउँमा ट्रम्पको पुतला जलाउँदै आक्रोश पोखिरहेका छन् ।
यसैबीच नवनिवार्चित राष्ट्रपतिले आफ्ना समर्थकको विशालसभालाई सम्बोधन गर्दै विजयको औपचारिक घोषणासँगै आफू सम्पूर्ण अमेरिकी नागरिकका लागि राष्ट्रपति हुने कुरा दोहोरयाउनुभएको छ । रासस, एएफपी
