अलेप्पो आक्रमणमा कम्तीमा सात मारिए

बेरुत, २६ असोज । सिरियाको दोस्रो सहर अलेप्पोमा विद्रोहीको बलियो प्रभाव रहेको इलाकालाई लक्ष्यगरी बुधबार गरिएको हवाई आक्रमण र गोली प्रहारमा परी कम्तीमा सात व्यक्तिको मृत्यु भएको मानवअधिकारीवादी समूहले जानकारी दिएको छ ।

द सिरियन अब्जरभेटरी फर ह्युम्यान राइट्सका अनुसार यस आक्रमण परी घाइते भएका व्यक्तिहरुको अवस्था चिन्ताजनक भएको हुनाले मृतकको सङ्ख्यामा पनि बढ्ने अनुमान गरिएको छ ।

बेलायतसँग आवद्ध मानवअधिकारवादी समूह द सिरियन अब्जरभेटरी फर ह्युम्यान राइट्सका अनुसार बजार इलाकालाई लक्ष्यगरी यो बमबारी भएको थियो ।

गत मङ्गलबार पनि सिरियामा भएको हवाई आक्रमणमा चार जना बालबालिकासहित २७ व्यक्तिको मृत्यु भएको थियो ।

गत मङ्गलबार नै सरकारको नियन्त्रणमा रहेको पश्चिमी अलेप्पोमा विद्रोहीले गरेको गोली प्रहारमा परी चार व्यक्तिको मृत्यु हुनुको साथै अन्य १४ जना घाइते भएका थिए ।

सिरियामा सन् २०११ मा सिरियाली राष्ट्रपति बसर अल असादको राजिनामाको माग गर्दै जनआन्दोलन सुरु भएको थियो ।

सो जनआन्दोलनपछि गएर जनयुद्धमा परिणत भयो । सो गृहयुद्ध हालसम्म पनि जारी रहेको छ र यसमा परी दुई लाख ९० हजारभन्दा बढी व्यक्तिको मृत्यु भइसकेको छ भने लाखौँ व्यक्ति घाइते भएका छन् ।

लाखौँ व्यक्ति आफ्नो घरवास छोडी देशभित्र र छिमेकी देशमा शरणार्थी जिवन विताउन बाध्य छन् ।