संयुक्त राष्ट्रसंघ, २४ असोज । येमनको राजधानी सानामा एक अत्येष्टि कार्यक्रममा गतः शनिबार राति भएको भीषण हवाइ आक्रमणको संयुक्त राष्ट्र संघका महासचिवले कडा शब्दमा निन्दा गर्नु भएको छ ।
अन्त्येष्टि संस्कार सम्पन्न गर्न राजधानी सानामा अवस्थित एउटा ठूलो हलमा भेला भएका सयांै व्यक्तिलाई लक्ष्यगरी सो हवाई आक्रमण गरिएको हो ।
केही प्रत्यक्षदर्शी घटनाका साक्षीहरुले बताएअनुसार हुथी विद्रोही समूहका वरिष्ठ अधिकारीहरु, उनीहरुका नजिकका समर्थकहरु तथा येमनका भूतपूर्व राष्ट्रपति अलि अब्दुल्लाह सालेह समेत सो हलमा उपस्थित थिए ।
संयुक्त राष्ट्रसंघको प्रारम्भिक प्रतिवेदनले जनाएअनुसार साउदी अरब नेतृत्वको गठबन्धन सेनाले उक्त हवाई आक्रमण गरेको र कम्तीमा १६० जनाको घटनास्थलमै मृत्यु भएको र ५३० भन्दा बढी घाइते भएका पनि राष्ट्रसंघीय महासचिव बान कि मूनका प्रवक्ताद्वारा प्रकाशित एक प्रेस बिज्ञप्तिमा जनाइएको छ ।
“एक त युद्धसँग सरोकारै नभएका निर्दोष नागरिकविरुद्ध आक्रमण हुनु नै अपराध हो । त्यसमाथि पनि अन्त्येष्टि संस्कारमा भेला भएका निहत्था जनताउपर आक्रमण गर्नु जस्तो महापाप कदापि स्वीकार्य हुन नसक्ने हुँदा यस घटनाको तत्काल निष्पक्ष छानबीन गरी आक्रमण गर्न, गराउन जिम्मेवारलाई न्यायको कठघरामा उभ्याउन” पनि राष्ट्रसंघीय महासचिवले आह्वान गर्नु भएको सो प्रेस विज्ञप्तिले उल्लेख गरेको छ ।
दुई वर्षअघि सन् २०१४ सेप्टेम्बरमा पूर्वराष्ट्रपति सालेहनजिकका राष्ट्रिय सेनाको समर्थन पाई सशस्त्र हुथी विद्रोहीले राजधानी साना र येमनका केही अन्य नगरहरुमा कब्जा जमाई तत्कालिन राष्ट्रपति अब्दुल रब्बु मन्सुर हाडि र उहाँको सरकारलाई निर्वासनमा जान बाध्य पारेका थिए ।
साउदी अरब नेतृत्वको गठबन्धन सेना राष्ट्रपति हाडि र उहाँको सरकारलाई समर्थन गर्छ । गतवर्षको मार्च महिनामा यस गठबन्धनले हुथि विद्रोही र पूर्वराष्ट्रपति सालेहको सेनाउपर सैनिक कारबाही चलाई निर्वासित राष्ट्रपति हाडिलाई पुन सत्तामा फर्काउन र राजधानी साना तथा विद्रोहीको कब्जामा रहेका अन्य नगरहरु मुक्त गराउन सहयोग गरेको थियो ।
संयुक्त राष्ट्रसंघको प्रारम्भिक प्रतिवेदनले थप जानकारी दिए अनुसार साउदी अरब नेतृत्वको गठबन्धन सेनाको स्थल तथा हवाई आक्रमणमा परी हालसम्म अधिकतर महिला तथा वालवालिका समेत १० हजारभन्दा बढी निर्दोष येमनी नागरीकहरुको ज्यान गै सकेको र अन्य करीब ३५ हजारजति घाइते भै सकेका छन् ।