सोमबार, कार्तिक १० २०७७ | Mon, October 26, 2020
नेपालको समय: १३:५३ | UK Time: 08:08

नवौं एनआरएनए युरोप क्षेत्रीय बैठकको तयारी तीव्र

वीनेपाली
२०७३ जेठ २४ गते २२:५९

nrnlogo

लन्डन । आउदो जुलाई ३० र ३१ तारिखमा डेनमार्कको कोपेनहेगनमा हुन गइरहेको गैर आवासीय नेपाली संघको नवौं युरोप क्षेत्रीय बैठक तथा सातौं महिला बैठकको तयारीको सिलसिलामा आइतबार बसेको बैठकले विभिन्न निर्णयहरु गरेको छ ।

टेलि कन्फरेन्स मार्फत बसेको बैठकमा बैठक तयारीका लागि गठित विभिन्न कार्यदलका संयोजकहरुले आआफ्नो कार्यदलको प्रगति विवरण सुनाएका थिए ।

आर्थिक कार्यदलका संयोजक प्रेम गुरुङले बैठकका लागि प्रायोजकहरुसंग सम्पर्क गर्ने काम भइरहेको जानकारी दिए । उनले आ आफ्नो व्यवसायको प्रचारप्रसार गर्न यो राम्रो अवसर हो भन्दै विगतमा जस्तै सम्मेलनको तयारीमा सघाउन एनआरएन एनसीसीहरुलाई आग्रह पनि गरे ।

स्मारिका प्रकाशन कार्यदलका संयोजक दावा शेर्पाले आउँदो जुन २० तारिख भित्र आआफ्ना एनसीसीका गतिविधिहरु प्रेषित गर्न अनुरोध गरे । उनले वरिष्ठ पत्रकारहरु समेतको सहयोगमा स्मारिका प्रकाशन गर्न लागिएको बताउँदै आफ्ना गतिविधिहरु छिटै पठाउन अनुरोध पनि गरे ।

एनआरएन आइसीसीका महासचिव बद्री केसीले बैठकको पूर्ण सफलताका लागि खटिरहेका साथीहरुलाई धन्यवाद दिंदै बैठकलाई सफल पार्न सक्दो सहयोग गर्न आइसीसी तयार रहेको बताए ।

एनआरएन आइसीसीका सचिव अर्जुन श्रेष्ठले बैठक आयोजनाकालागि व्यक्तिगतरुपमा १,००० युरो सहयोगको घोषणा गर्दै यसअघिका युरोपेली क्षेत्रीय बैठकहरुको अनुभव सुनाए । त्यसैगरी आइसीसी सदस्य एकराज गिरीले बैठक सफल पार्न सबै एनआरएन सदस्यहरुले तन, मन र धनले सहयोग गर्नुपर्ने बताए ।

यसैगरी सो बैठकले नवौं युरोप क्षेत्रीय बैठक तथा सातौं महिला बैठकका लागि “युरोपका नेपालीको अभियानः लगानी, पुनर्निर्माण र पर्यटन“ भन्ने नारा निश्चित गरेको छ ।

बैठकमा एनआरएनएकी महिला सहसंयोजक रजनी प्रधानको प्रस्तावमाथि छलफल पश्चात् कोपेनहेगन बैठकका लागि सहभागी दर्ता शुल्क १०० युरो तोकिएकोमा एनआरएनए एनसीसीका महिला सदस्यहरुका लागि ८० युरो मात्र तोक्ने निर्णय पनि गरेको छ ।

एनआरएनएकी महिला संयोजक सपिला राजभण्डारीले सो निर्णयको स्वागत गर्दै एनआरएनसंग आवद्ध महिला साथीहरुलाई उल्लेख्य संख्यामा बैठकमा सहभागी हुन आग्रह गरिन् ।

बैठकले कोपेनहेगन बैठकको कार्यक्रमको ढाँचा तयार गर्न आइसीसीका सल्लाहकार डा. हेमराज शर्मालाई आग्रह गर्ने निर्णय पनि गरेको छ ।

एनआरएन एनसीसीका अध्यक्ष दीपेन्द्र चुडालले बैठकको तयारीबारे जानकारी दिंदै सबै एनसीसीहरुलाई बैठकका सहभागीहरुबारे जति सक्दो चांडो जानकारी दिन पनि अनुरोध गरे । उनले भिसा लगाउनु पर्ने मुलुकका साथीहरुले निम्तोपत्रका लागि सकभर छिटो एनसीसी डेनमार्कलाई सम्पर्क गर्न आग्रह गरे । उनले एनआरएन डेनमार्कको वेबसाइट  http://nrndenmark.dk/erm_registration   मा गएर पनि रजिस्ट्रेसन गर्न सकिने जानकारी दिए ।

बैठकको संचालन गरिरहेका एनआरएन युरोपका सहसंयोजक तथा नवौं युरोप क्षेत्रीय बैठक एवं सातौ महिला बैठक आयोजक समितिका सचिव सोम सापकोटाले डेनमार्क केही महँगो मुलुक भएको र जुलाई, अगस्टमा होटेलहरु पनि महँगो हुने भएकाले जति सक्दो चाँडो होटेल बुक गर्न अनुरोध गरे । उनले कुनै पनि सहयोग चाहिए आयोजक डेनमार्क एनसीसीलाई सम्पर्क गर्न आग्रह गरे ।

बैठकको अध्यक्षता गरिरहेका गैर आवासीय नेपाली संघका युरोप क्षेत्रीय संयोजक कुल आचार्यले हरेक २ वर्षमा हुने उक्त बैठकलाई भव्यरुपमा सफल पार्न सबै साथीहरुलाई आग्रह गरे । उनले एनआरएनको लक्ष्य पुरा गर्न यस्ता बैठकहरु महत्वपूर्ण हुने बताउदै खासगरी अर्थ संकलनमा सघाउन सबैलाई आग्रह पनि गरे । आचार्यले नवौं युरोप क्षेत्रीय बैठककालागि १,००० युरो सहयोग गर्ने घोषणा पनि गरेका थिए । बैठकमा विभिन्न महानुभाव तथा एनसीसीहरुबाट आठ हजार युरो भन्दा बढी रकम सहयोगको घोषणा गरिएको थियो भने अरु रकम उठ्ने क्रम जारी रहेको आर्थिक कार्य दलका संयोजक प्रेम गुरुङले बताए ।

समितिको अर्को बैठक आउँदो ३ जुलाइमा बस्ने र त्यसमा बैठकको कार्यक्रमलाई अन्तिम रुप दिइने बताइएको छ ।

प्रतिक्रिया

सम्बन्धित सामाग्री

फेसबुक