डेनमार्कमा पर्यटकलाई नेपाल भ्रमण गराउन कार्यक्रम

denmark

कोपनहेगन । नेपालको भूकम्पपश्चात नेपाल, नेपाली जनता र अर्थतन्त्रले भोगेको क्षतिको समीक्षा, घट्नामा दिबंगत र घाइतेहरुको स्मरण र पुनर्निर्माण कार्यक्रमबारे जानकारी दिन यहां एक कार्यक्रम आयोजना गरिएको छ ।
गत सोमबार आयोजित सो कार्यक्रम नेपाल पर्यटन बोर्डका मानार्थ जनसम्पर्क प्रतिनिधि सोमनाथ सापकोटाको सक्रियतामा भएको हो ।
कार्यक्रममा मानवशास्त्री एवं नेपाल नाउ अभियानका अन्तर्राष्ट्रिय प्रतिनिधि होर्तुर स्मारासनले सबै पर्यटकीय पूर्वाधार र पर्यटकीय क्षेत्रहरु तथा ट्रेकिंग रुटहरू पूर्ववत संचालनमा रहेकाले विश्वकै उत्कृष्ट गन्तव्यमा सूचिकृत नेपाल भ्रमण गर्न प्रेरित गरे । ज्वालामुखीले ध्वस्त हुंदा समेत आइसल्याण्ड त्यसको केही वर्षमा आर्थिक सम्वृद्धिको बाटोमा लागेको उदाहरण प्रस्तुत गर्दै नकारात्मकभन्दा सकारात्मक कुराहरुलाई बढावा दिने समाचार, जानकारी दिन मिडियालाई सचेत गराए ।
पर्यटन बोर्डका जनसम्पर्क प्रतिनिधि सापकोटाले कार्यक्रमको औचित्य प्रष्ट पार्दै सहभागीहरुलाई स्वागत गरेका थिए । कार्यक्रम सञ्चालनको जिम्मेवारी समेत सम्हालेका नेपाली दूतावासका काउन्सिलर रामकाजी खड्काले नेपाल भ्रमण गर्नुपर्ने कारणहरुको बेलिबिस्तार लगाए । उनले नेपालको प्राकृतिक, संस्कृतिक, जलवायु, जीव वनस्पति आदि विविधताबारे चर्चा गर्दै नेपाल पर्यटकका लागि सही गन्तव्य भएको आधारहरु प्रस्तुत गरे।
बेलायती पत्रकारद्वय रिची जोन्स्तोन र नियल मैकलौलिनले आफ्नो दुई महिने नेपाल भ्रमणका बखत तयार गरेको नेपाली सम्पदा, प्रकृति, संस्कृति र जनजीवन झल्किने पहाडको संगीत शीर्षकको डकुमेन्ट्री प्रस्तुत गर्दै नेपाल भ्रमणबाट आफूहरु खुशी भएर फर्किएको अनुभव सुनाए ।

नेपाली राजदूत मुक्तिनाथ भट्टले नेपालको मापनमा गत सालको भूकम्प महाभूकम्प नभएपनि कमजोर संरचना र त्यस्तै भौगोलिक बनावटले गर्दा अलिक बढी क्षति हुन पुगेको तर अब नेपाल आवतजावत तथा घुमफिरमा कुनै अबरोध नभएको बताए । आमन्त्रित अतिथिहरुलाई उनले धन्यवाद पनि दिए ।

बिभिन्न संघ संस्थामा आवद्ध प्रतिनिधिहरु, डेनिस सरकारी अधिकारीहरू, कुटनीतिक व्यक्तित्वहरु, पत्रकार एवं नेपालका शुभचिन्तकहरुको उत्साहजनक उपस्थिति रहेको उक्त कार्यक्रममा सहभागीहरुलाई नेपाली लोक संगीत र नृत्यले मनोरन्जन गराइएको थियो भने नेपाली खाना खुवाइएको थियो । कार्यक्रमपछि सहभागीहरुले नेपालप्रति निकै चासो र नेपाल भ्रमणको उत्सुकता दर्शाएका थिए ।

प्रतिक्रिया

सम्बन्धित सामाग्री