शनिबार, कार्तिक ८ २०७७ | Sat, October 24, 2020
नेपालको समय: ०८:४४ | UK Time: 03:59

काठमाडौँमा भीषण हुरी, २२ मिटर प्रतिसेकेन्ड वेग

वीनेपाली
२०७२ चैत १५ गते १६:३८

तस्विरः इकान्तिपुर

तस्विरः इकान्तिपुर

काठमाडौँ, १५ चैत । पश्चिमी न्यून चापीय प्रणालीको असरका कारण नेपालको मौसममा आज खराबी आएको छ ।

आज काठमाडौँसहित मध्य र पश्चिमी भेगमा भीषण हावाहुरी आयो भने केही स्थानमा वर्षासमेत भयो । अपराह्न चलेको हावाहुरीबाट काठमाडौँ उपत्यकावासी भयभित हुनपुगेका थिए ।

आइतबार देशको पश्चिमी क्षेत्रबाट प्रवेश गरेको न्यून चापीय प्रणालीको असरले आज खासगरी काठमाडौँ उपत्यकाको मध्यभाग र पश्चिमको पोखरा आसपासका जिल्लामा हुन्डरी उठेको मौसमविद् सुवास रिमालले बताउनुभयो ।

उहाँका अनुसार काठमाडौँमा अधिकतम २२ मिटर प्रतिसेकेन्डको वेगमा हावा बहेको थियो जुन प्रतिघन्टा ८० किमी हुनजान्छ । पोखरादेखि काठमाडौँसम्म ढाक्ने बादलको प्रणालीसमेत बनेको थियो ।

यो प्रणालीसँगै काठमाडौँमाथि उच्च वायुमण्डलमा न्यूनचापीय क्षेत्रको विकास भएर बढी प्रभाव काठमाडौँमा परेको मौसमविद् रिमालले उल्लेख गर्नुभयो ।

काठमाडौँ र पोखराबीचका केही क्षेत्रमा चट्याङ र विभिन्न क्षेत्रमा हल्का वर्षासमेत भएको मौसम पूर्वानुमान महाशाखाले जनाएको छ । काठमाडौँमा शून्य दशमलव एक र पोखरामा १६ दशमलव २ मिलिमिटर वर्षा भयो ।

मौसमविद् रिमालका अनुसार न्यूनचापीय प्रणाली क्रमशः पूवतर्फ सर्दै गएको छ र मङ्गलबारदेखि मौसममा सुधार आउनेछ ।

प्रतिक्रिया

सम्बन्धित सामाग्री

फेसबुक