शनिबार, कार्तिक १५ २०७७ | Sat, October 31, 2020
नेपालको समय: १५:४२ | UK Time: 09:57

अन्तर्राष्ट्रिय पर्यटन प्रवर्धनका विशेष कार्यक्रम ल्याइने

वीनेपाली
२०७२ चैत ११ गते १६:०२
पर्यटकीय नगरी पोखरास्थित फेवाताल । फेवाताल सहितका पोखराका नौवटा ताल रामसार सूचिमा सूचीकृत भएसँगै अन्तर्राष्ट्रियस्तरमा परिचित भएको छ । तस्बिर ः वासुदेव पौडेल, पोखरा, रासस

पर्यटकीय नगरी पोखरास्थित फेवाताल । फेवाताल सहितका पोखराका नौवटा ताल रामसार सूचिमा सूचीकृत भएसँगै अन्तर्राष्ट्रियस्तरमा परिचित भएको छ । तस्बिर ः वासुदेव पौडेल, पोखरा, रासस

काठमाडौँ, ११ चैत । मुलुकको पर्यटन क्षेत्रकै जेठो संस्था नेपाल एसोसिएसन अफ टुर एन्ड ट्राभल एजेन्ट्स (नाट्टा) ले अन्तर्राष्ट्रिय बजारमा पर्यटन प्रवर्धनका लागि विशेष कार्यक्रम ल्याउने भएको छ ।

भूकम्प र नाकाबन्दीबाट सङ्क्रमणमा परेको पर्यटन व्यवसायले बिस्तारै गति लिन थालेका अवस्थामा नाट्टाले नेपालको पर्यटन बजारका विविध आयामबारे अन्तर्राष्ट्रिय सञ्चारमाध्यम मार्फत बढी पर्यटक आकर्षण गर्ने योजना अघि सारेको हो । नाट्टाका अध्यक्ष मधुसूदन आचार्यले नेपालको पर्यटनलाई अन्तर्राष्ट्रिय बजारमा प्रवर्धन गरी बढी पर्यटक भित्र्याउने योजनाबद्ध कार्यक्रम ल्याइने बताउनुभयो ।

राष्ट्रिय पर्यटन पत्रकार सङ्घ (नाटोज) का नवनिर्वाचित कार्यसमितिलाई स्वागत तथा बधाई दिन आज यहाँ आयोजित कार्यक्रममा उहाँले भन्नुभयो, “अबको हाम्रो लक्ष्य भनेकै अन्तर्राष्ट्रिय बजारलाई प्राथमिकता दिएर पर्यटक आकर्षण गर्नु हो, त्यसका लागि नाट्टाले चाँडै ठूला प्रवर्धनात्मक कार्यक्रम गर्दैछ, पर्यटकको सङ्ख्या बढाउन नयाँ गन्तव्यको पहिचान र प्रवद्र्धन तथा पूर्वाधार विकासमा जोड दिइनुपर्छ । ”
मुख्य पर्यटकीय मौसम सुरु भएसँगै पर्यटक आवागमनको सुरुआती चरण उत्साहजनक रहेको भन्दै उहाँले पर्यटन पत्रकारसँग संस्थागत सहकार्य गरी प्रवर्धनात्मक कार्यक्रमलाई तीव्रता दिइने बताउनुभयो ।

नाटोजका अध्यक्ष शिव अधिकारीले पर्यटन प्रवद्र्धनको जिम्मा लिएका सरकारी निकाय तथा निजी क्षेत्रलाई थप चलायमान बनाउन पर्यटन पत्रकारका तर्फबाट सशक्त भूमिका निर्वाह गरिने बताउनुभयो ।

यसैबीच नाट्टाले पर्यटन क्षेत्रमा क्रियाशील पत्रकारको प्रोत्साहनका लागि संस्थाले प्रदान गर्दै आएको पत्रकारिता पुरस्कारका विधालाई बढाई पाँच विधामा यसै वर्षदेखि पुरस्कृत गरिने जनाएको छ ।

प्रतिक्रिया

सम्बन्धित सामाग्री

फेसबुक