शनिबार, कार्तिक ८ २०७७ | Sat, October 24, 2020
नेपालको समय: २३:०५ | UK Time: 18:20

महानगरमा ६ हजार सौर्य बत्ती जडान गरिने

वीनेपाली
२०७२ चैत ११ गते १५:४९
हेलिकप्टरबाट बिहीबार देखिएको काठमाडौँ उपत्यकाको दृश्य । तस्बिर ः प्रदीपराज वन्त, रासस

हेलिकप्टरबाट बिहीबार देखिएको काठमाडौँ उपत्यकाको दृश्य । तस्बिर ः प्रदीपराज वन्त, रासस

काठमाडौँ, ११ चैत । रु ८० करोडको लगानीमा काठमाडौँ महानगरपालिका ९कामपा० को विभिन्न सडकमा छ हजार ‘सौर्य सडक बत्ती’ जडान गरिने भएको छ ।

कामपाका सडकलाई उज्यालो पार्न समुदायमा आधारित सौर्य सडक बत्ती जडान गर्न लागिएको हो । कामपा, भौतिक पूर्वाधार तथा निर्माण विभाग प्रमुख डा उत्तरकुमार रेग्मीका अनुसार बत्ती जडानका लागि १५० निवेदन परेको छ । सौर्य बत्ती जडान गर्न उपभोक्ताले १५ प्रतिशत, महानगरपालिकाले २५ प्रतिशत र सरकारले ६० प्रतिशत लगानी गर्ने छन् । विद्युत्भार कटौतीको समयमा राजधानीलाई उज्यालो बनाउन सौर्य बत्ती जडान गर्न लागिएको रेग्मीको भनाइ छ ।

त्यस्तै राति आवागमन सहज हुने, दुर्घटना कम हुने र आपराधिक क्रियाकलाप कमी ल्याउन सहयोग पुग्ने अपेक्षासहित सौर्य बत्ती कार्यक्रम कार्यान्वयन गर्न लागिएको हो । यस कार्यक्रमअन्तर्गत विद्यालय, अस्पताल, सार्वजनिक सङ्घसंस्था र सेवामूलक क्षेत्रलगायतले संस्थागत रुपमा सोलार राख्न चाहेमा ७० प्रतिशत सरकारले लगानी गर्नेछ भने ३० प्रतिशत सम्बन्धित संस्थाले नै लगानी गर्नुपर्ने छ ।

प्रमुख रेग्मीका अनुसार पोलसहित एउटा सौर्य बत्ती जडान गर्न रु एक लाखसम्म लगानी लाग्नेछ । अठारौँ दक्षिण एसियाली क्षेत्रीय सहयोग सङ्गठन ९सार्क० शिखर सम्मेलनका समयमा नारायणगोपालचोक, बानेश्वर, कोटेश्वर, सिंहदरबार, माइतीघर, थापाथली र पुरानो बसपार्कलगायत स्थानमा सौर्य जडान गरिएको थियो ।

सार्क सम्मेलनका क्रममा महानगरपालिकाले सौर्य प्रणाली जडान गर्न रु १० करोडको लगानी गरेको थियो । त्यसबेला १५० वटा सौर्य बत्ती राखिएका थिए । त्यतिबेला जडान भएका सौर्य बत्ती मर्मत सम्भारको अभावमा केही बिग्रिएका छन् । महानगरले विगतमा जडान गरिएका सौर्य प्रणालीको मर्मत सम्भारमा समेत ध्यान दिने जनाएको छ ।

प्रतिक्रिया

सम्बन्धित सामाग्री

फेसबुक