आइतबार, कार्तिक ९ २०७७ | Sun, October 25, 2020
नेपालको समय: २२:०८ | UK Time: 16:23

एक वर्षभित्र एमाओवादी महाधिवेशन

वीनेपाली
२०७२ चैत ७ गते १३:४४

pushpa_kamal_dahal_20120709082554

काठमाडौँ, ७ चैत । एकीकृत नेकपा(माओवादी) का अध्यक्ष पुष्पकमल दाहलले आगामी एक वर्षभित्र पार्टीको महाधिवेशन गर्ने प्रस्ताव प्रस्तुत भएको छ ।

पार्टी केन्द्रीय कार्यालय पेरिसडाँडामा आजको केन्द्रीय समितिको बैठकमा उहाँले पार्टी महाधिवेशनको प्रस्ताव गर्नुभएको हो । पार्टी प्रवक्ता दीनानाथ शर्माका अनुसार वडादेखि प्रदेशतहसम्मको अधिवेशन गर्ने र एक वर्षभित्र महाधिवेशन गर्ने प्रस्ताव भएको हो ।

यस्तै दाहालले पार्टीलाई सङ्गठित, व्यवस्थित बनाउँदै विभिन्न रुपमा रहेका माओवादी दल तथा समूहसँग एकता गर्ने प्रस्तावसमेत गर्नुभएको छ ।

उहाँले जनतालाई पुनःविश्वासमा लिएर पार्टीलाई एक नम्बरको बनाउने र राष्ट्रिय समस्या समाधानमा प्रतिबद्ध भएर लाग्न जनपरिचालन एवम् सङ्गठन सुदृढीकरण अभियान सञ्चालन गर्नेसमेत आफ्नो प्रस्तावमा उल्लेख गर्नुभएको छ ।

यस्तै पार्टी परित्याग गरी नयाँ शक्तिमा लागेका नेताको स्थानमा पदपूर्ति गर्न सचिव वर्षमान पुनको संयोजकत्वमा एक कार्यदलको प्रस्ताव गरिएको छ । सो कार्यदलको प्रतिवेदनका आधारमा आवश्यक निर्णय लिइनेछ ।

शनिबारबाट सुरु भएको बैठकमा प्रदेश इन्चार्ज एवम् सचिवले आ–आफ्नो क्षेत्रको प्रतिवेदन पेस गर्नुभएको थियो । पार्टीले पछिल्लोे कार्यनीतिका कारण देशव्यापी रुपमा केही सुधार भए पनि सरकारका सहभागी मन्त्रीको कार्यशैली जनपक्षीय नभएको भन्दै आलोचना भएको छ ।

पार्टी निर्माण गर्ने लक्ष्यका साथ सरकारमा सहभागी भए पनि जनअपेक्षित रुपमा सरकारको काम प्रभावकारी नभएको भन्दै प्रदेशका इन्चार्ज एवम् सचिवले आपत्ति जनाउनुभएको थियो ।

यस्तै उहाँहरुले रुपान्तरणका लागि नेतृत्वबाटै सुरु गर्नुपर्ने र त्यो पार्टी सदस्यसम्म पुग्नुपर्नेमा उहाँहरुको जोड थियो । बैठक सोमबार पुनः बस्नेछ ।

प्रतिक्रिया

सम्बन्धित सामाग्री

फेसबुक