एमए पास गरेका युवा गाईभैँसी पालनमा

मोरङ । विश्वविद्यालयका प्रमाणपत्र बोकेर जागिरका लागि युवायुवती धाउने प्रशस्त छन् । कुनै सरकारी तथा निजी संस्थामा जागिरका लागि सूचना गरेको थाहा पाउनेबित्तिकै फारम भर्नेको भीड हुन्छ ।

समाजमा थोरै मात्रै यस्ता युवा छन्, जसले जागिरका लागि धाउने हैन, आफैँ गर्ने हो भनेर कम्मर कसेर लागेका छन् । यस्ता युवाको पङ्तिमा पर्दछन् विराटनगर १८, जतुवाका सिकेन्द्रसिंह यादव ।

कुनैबेला जागिर दिनुस् नै हजुर भन्दै विभिन्न सरकारी, गैरसरकारी कार्यालयमा प्रमाणपत्र लिंदै हिँड्ने उहाँलाई अहिले आफ्नै व्यवसायमा लागेपछि भ्याइनभ्याइ भएको छ ।

एसएलसी उत्तीर्ण गरेपछि सरकारी जागिरका लागि धाउन थाल्नुभएका उहाँले धेरैपटक लोकसेवाको परीक्षा दिनुभयो । तर, सफलता प्राप्त गर्न सक्नुभएन ।

सरकारी जागिर हात नलागे पनि वाणिज्य शास्त्रमा स्नातकोत्तर गर्नुभएका उहाँले आफैँले केही गर्ने केही योजना बनाउनुभयो ।

यादव परिवारले पहिल्यैँदेखि गाईपालन गर्दै आएका थिए । परम्परागत गाईपालन व्यवसायले भने सोचे जस्तो प्रतिफल दिनसकेको थिएन । घरको सामान्य गर्जो मात्रै टार्ने गरेको थियो । यही व्यवसायलाई अघि बढाउने गरी उहाँले योजना बनाउनुभयो । तर पैसा नहुँदा कसरी लगानी गर्ने भन्ने चिन्ताले सताउँदा युवा स्वरोजगारसम्बन्धी कार्यक्रम उहाँले थाहा पाउनुभयो ।

बेरोजगार युवालाई सरकारले पैसा दिने बुझेपछि सम्पूर्ण प्रक्रिया पूरा गर्नुभयो र उहाँको आवेदन स्वीकृत भई रु दुई लाख पाउनुभयो । बचत र युवा स्वरोजगार कोषको अनुदानबाट अहिले उहाँको गोठमा तीनवटा उन्नत जातको जर्सी गाई, दुईवटा भैँंसी, चारवटा बाच्छी छन् ।

दैनिक २५/३० लिटर दूध बिक्री गर्ने गर्नुहुन्छ उहाँ । गाईभैँसीपालनमा व्यस्त भएपछि उहाँको दैनिकी पनि फेरिएको छ ।
बजारसम्म दूध लैजानका लागि उहाँलाई बुबा शिवराम, आमा उर्मीला, दाजु धर्मेन्द्र भाई पप्पु र विदुरले सहयोग गर्दैआउनु भएको छ ।

बिहान ५ बजेदेखि राति ८ बजेसम्म उहाँ गाईभैँंसीकै स्याहारमै रहनुहुन्छ । कुनैबेला व्यावसायिक गाईपालनको विरोध गर्ने उहाँका बुबा सिकेन्द्रको मेहनतबाट खुसी हुनुहुन्छ ।

दुई वर्षभित्रमा १० वटा उन्नत जातका गाईको दूध बजारसम्म पुर्याउने उहाँको लक्ष्य छ । यसका लागि उहाँले बचत गर्न दैनिक दुई लिटर दूधको पैसा सहकारीमा जम्मा गर्नुभएको छ ।

व्यावसायिक गाईपालनमा लाग्ने उहाँको दृढ अटोटपछि उहाँले गाउँमै पशु बीमासमेत भित्र्याउनुभयो । यसका लागि बीमाको अभिकर्ताको काम पनि उहाँले गर्दैआउनु भएको छ । जतुवा र भाथिगछ गाविसमा उहाँले १०० वटा पशुको बीमा गराइसक्नु भएको छ ।

गाई भैँसीपालन व्यवसाय सफल हुँदै गएपछि बेरोजगार र विदेशिन जाने युवालाई यस व्यवसायतर्फ लाग्न सुझाव पनि दिने गर्नुभएको छ ।

उहाँको मेहनत र सफलताको गाउँमा निकै प्रशंसा हुने गरेको छ । विराटनगरमा दूधको बजारको कुनै पनि समस्या उहाँले देख्नुभएको छैन ।

उहाँ भन्नुहुन्छ ‘आफूले राम्रो उत्पादन गरेपछि जहाँ पनि बिक्री हुन्छ ।’ मासिक रु एक लाख आम्दानी गर्ने उहाँले योजना रहेको छ ।