बुधबार, कार्तिक १२ २०७७ | Wed, October 28, 2020
नेपालको समय: ०६:४१ | UK Time: 00:56

महासचिव बान र उपप्रधानमन्त्री मैनालीबीच भेटवार्ता

वीनेपाली
२०७२ चैत ४ गते ९:२१
Ban-Ki-moon

संयुक्त राष्ट्रसङ्घका महासचिव बान

काठमाडौँ, ४ चैत । संयुक्त राष्ट्रसङ्घका महासचिव बानकी मुनसँग उपप्रधानमन्त्री एवम् महिला, बालबालिका तथा समाजकल्याणमन्त्री चन्द्रप्रकाश मैनालीले राष्ट्रसङ्घको प्रधानकार्यालयमा आज द्विपक्षीय भेटवार्ता गर्नुभयो ।

संस्कृति, पर्यटन तथा नागरिक उड्डयनमन्त्री आनन्दप्रसाद पोखरेल र पूर्व महिला, बालबालिका तथा समाजकल्याणमन्त्री नीलम केसीका साथ भएको उक्त भेटवार्तामा उपप्रधानमन्त्री मैनालीले नेपालको राजनीतिक एवम् सामाजिक विकासमा राष्ट्रसङ्घबाट प्राप्त सहयोगप्रति आभार व्यक्त गर्नुभयो ।

लोकतान्त्रिक एवम् समावेशी चरित्रको नेपालको नयाँ संविधानबारे जानकारी गराउँदै उहाँले वार्ताका माध्यमबाट संविधानका बाँकी विषय मिलाउन सरकार क्रियाशील रहेको बताउनुभयो । सरोकारवाला र सरकारबीच उच्चस्तरीय राजनीतिक समिति बनाएर समस्याको समाधानमा सरकारी प्रयास जारी रहेको जानकारी पनि उहाँले महासचिवलाई गराउनुभएको न्युयोर्कस्थित स्थायी नेपाली नियोगले जनाएको छ ।

उहाँले प्रधानमन्त्री केपी शर्मा ओलीका तर्फबाट महासचिव बानलाई २५६०औँ बुद्धजयन्तीका अवसरमा नेपाल भ्रमणको आमन्त्रणपत्र पनि हस्तान्तरण गर्नुभयो ।

उक्त नियोगका अनुसार महासचिव बानले लैङ्गिक समानता, महिला सशक्तीकरणका निम्ति महिलाको अवस्थासम्बन्धी राष्ट्रसङ्घीय आयोगको भूमिका महत्वपूर्ण हुने बताउनुभयो ।

नेपालले गरेका विकासका प्रयासलाई आफूले निकटबाट नियालिरहेको बताउँदै महासचिव बानले निकट भविष्यमा उपमहासचिव जान एलिसोनको नेतृत्वमा राष्ट्रसङ्घीय प्रतिनिधिमण्डल पठाउन लागेको जानकारी दिनुभयो ।

प्रतिक्रिया

सम्बन्धित सामाग्री

फेसबुक