
मधेसी मोर्चाका नेताहरु दिल्ली प्रस्थान
काठमाडौँ, ३० फागुन । भारतको नयाँ दिल्लीमा आयोजना हुने एक कार्यक्रममा सहभागी हुन संयुक्त लोकतान्त्रिक मधेसी मोर्चाका नेताहरु आज त्यसतर्फ गएका छन् ।
नेपाल–भारत महिला मैत्री समाजको एक गोष्ठीमा सहभागी हुन मोर्चाका नेताहरु दिल्ली गएका हुन् ।
सोही कार्यक्रममा सहभागी हुन नेपाली काँग्रेस, नेकपा (एमाले) र राष्ट्रिय प्रजातन्त्र पार्टीका नेताहरु पनि दिल्ली गएको मोर्चाको एक घटक तराई–मधेस लोकतान्त्रिक पार्टी (तमलोपा)का नेता सर्वेन्द्रनाथ शुक्लले राससलाई जानकारी दिनुभयो ।
उहाँका अनुसार भारतमा रहँदा मोर्चाका नेताहरुको भारतीय उच्च अधिकारीसँग विशेष भेटवार्ता हुनसक्छ र त्यसका लागि प्रयास भइरहेको छ । उहाँले भन्नुभयो – “समाजको मुख्य कार्यक्रम भोलि हो, आज छलफल मात्र हुन्छ । उक्त कार्यक्रममा भारतीय नेताहरु पनि सहभागी हुने भएकाले स्वाभाविक रुपमा मोर्चाका नेताहरुले कुराकानी गर्नुहुनेछ । विशिष्ट भेटवार्ताका लागि प्रयास भइरहेको छ, अहिले टुङ्गो लागिसकेको छैन ।”
तमलोपाका अध्यक्ष महन्थ ठाकुर, सङ्घीय समाजवादी फोरम नेपालका अध्यक्ष उपेन्द्र यादव, तमलोपाका सहअध्यक्ष हृदयेश त्रिपाठीलगायतका नेताहरु भारत जानुभएको हो । सद्भावनाका अध्यक्ष राजेन्द्र महतो भने पार्टीको काममा व्यस्त रहनुभएकाले दिल्ली जानुभएको छैन । रौतहटको गौरमा पूर्वघोषित कार्यक्रम परेकाले महतो दिल्ली नजानुभएको सद्भावनाका नेता मनिष सुमनले जानकारी दिनुभयो ।
प्रतिक्रिया

सम्बन्धित सामाग्री
- बेलायतमा कसरी बन्यो कोभिड–१९ बारे जानकारी दिने नेपाली भाषामा पर्चा ?
- सोमबारदेखि बेलायत छोड्न फाराम भर्नुपर्ने, २०० पाउण्ड जरिवाना हुनसक्ने
- आजदेखि बेलायत आइपुग्ने यात्रुले १० दिन होटल क्वारेन्टिनमा बस्न पर्ने
- कारोना संक्रमणका कारण प्रवासमा मृत्यु भएकाको शव नेपाल लैजाने पाइने
- गोरखा भूपू सैनिकको समस्याबारे प्राविधिक समितिको प्रतिवेदनमाथि बेलायतले नेपालसित वार्ता नगर्ने