शनिबार, कार्तिक १५ २०७७ | Sat, October 31, 2020
नेपालको समय: २१:२१ | UK Time: 15:36

खुल्ला केन्द्रीय सदस्यको मतगणना जारी, आरक्षणको पनि आजै हुने

वीनेपाली
२०७२ फागुन २७ गते ८:५०
नेपाली काँग्रेसको १३ औं महाधिवेशनले निर्वाचित गर्ने खुलातर्फको २५ केन्द्रीय सदस्य पदमा भएको निर्वाचनको मतगणना पार्टी केन्द्रीय कार्यालय सानेपामा हुँदै । तस्बिर ः भीष्म ओझा, रासस

नेपाली काँग्रेसको १३ औं महाधिवेशनले निर्वाचित गर्ने खुलातर्फको २५ केन्द्रीय सदस्य पदमा भएको निर्वाचनको मतगणना पार्टी केन्द्रीय कार्यालय सानेपामा हुँदै । तस्बिर ः भीष्म ओझा, रासस

काठमाडौँ, २७ फागुन । नेपाली काँग्रेसको १३औँ महाधिवेशनबाट खुल्ला केन्द्रीय सदस्य चयनका लागि भएको निर्वाचनको मतगणनाको काम आज पनि जारी छ ।

बुधबार साँझ ७ बजे स्थगित भएको मतगणना आज बिहान ११ बजेपछि मात्रै केन्द्रीय कार्यालय सानेपामा सुरु भएको केन्द्रीय कार्यालयका सचिव प्रकाश शर्माले जानकारी दिनुभयो । बुधबार बेलुकासम्म १५० मतको गणना गरिएको थियो । आज मात्रै झन्डै ६० मतको गणना भएको र १०० पुगेपछि मात्रै सार्वजनिक गर्ने तयारी गरिएको शर्माले बताउनुभयो ।

कुल २५ खुल्ला केन्द्रीय सदस्यका लागि ९० जनाको उम्मेदवारी परेको र सबै उम्मेदवारका प्रतिनिधिहरु राखेर मतगणना गर्दा ढिलो भएको उहाँले बताउनुभयो । दुई ठाउँमा मतगणना गर्ने भनिए पनि अहिलेसम्म एक ठाउँमा मात्रै भइरहेको छ । खुल्लातर्फको गणना जारी रहेकै बेला आजै समावेशी आरक्षणतर्फको मतगणना पनि सुरु गर्ने तयारी भइरहेको छ ।

दलित र मुस्लिम आरक्षणको मतगणना आजै गरी नतिजा पनि आजै सार्वजनिक गरिने शर्माले राससलाई जानकारी दिनुभयो । दलित तीन केन्द्रीय सदस्यका लागि २० र दलित महिलातर्फ दुई केन्द्रीय सदस्यका लागि पाँचजनाको उम्मेदवारी परेको छ ।

त्यसैगरी, मुस्लिम आरक्षणतर्फ एक पदका लागि छजना उम्मेदवार मैदानमा हुनुहुन्छ । काँग्रेसको अन्य आरक्षणमध्ये छ महिला केन्द्रीय सदस्य पदका लागि ३८, प्रत्येक प्रदेशमा हुने दुई केन्द्रीय सदस्यका लागि प्रदेश नं १ मा १३, प्रदेश नं २ मा पाँच, प्रदेश नं ३ मा १८, प्रदेश नं ४ मा नौ, प्रदेश नं ५ मा १०, प्रदेश नं ६ मा पाँच र प्रदेश नं ७ मा सातजना उम्मेदवार छन् ।

त्यसैगरी आरक्षणमा आदिवासी जनजातितर्फ तीन केन्द्रीय सदस्यका लागि ४०, आदिवासी जनजाति महिलातर्फका दुई केन्द्रीय सदस्यका लागि १२, मधेसी आरक्षणतर्फ तीनका लागि १५ र मधेसी महिलाका लागि नौजना उम्मेदवार प्रतिस्पर्धामा छन् । महाधिवेशनबाट पार्टीका सभापतिमा शेरबहादुर देउवा, महामन्त्रीमा डा शशाङ्क कोइराला र कोषाध्यक्षमा सीतादेवी यादव विजयी भइसक्नुभएको छ ।

प्रतिक्रिया

सम्बन्धित सामाग्री

फेसबुक