बेलायती राजकुमार ह्यारीले २० देखि २३ मार्च सम्म नेपाल भ्रमण गर्ने

Prince Harry

लन्डन । बेलायती राजकुमार ह्यारीको नेपाल भ्रमण मिति तय भएको छ । ह्यारीले आगामी २० मार्च आइतबार देखि २३ मार्च बुधवारसम्म नेपाल भ्रमण गर्ने भएका हुन् । केन्जिङ्टन प्यालेसले बिहीबार ट्वीटर र एक विज्ञप्तिमार्फत भ्रमण मिति तय भएको जानकारी दिएको हो । यसअघि आउंदो वसन्त ऋतु (स्प्रीङ) मा पहिलो पटक ह्यारीले नेपाल भ्रमण गर्ने जानकारी मात्र दिइएको थियो ।

भ्रमणका क्रममा उनले राष्ट्रपति विद्यादेवी भण्डारीलाई भेट्ने कार्यक्रम छ । साथै उनले भूकम्पबाट प्रभावितहरुलाई भेटेर पुनर्निर्माणमा भइरहेका प्रयासहरु समेत बुझ्ने प्यालेसले जनाएको छ ।

अफगानिस्तानमा गोर्खाहरुसंगै काम गरेका राजकुमार ह्यारीले पोखराको ब्रिटिश क्याम्प समेत भ्रमण गर्ने जनाइएको छ । त्यसक्रममा उनले गोर्खा भर्ती प्रक्रियाबारे जानकारी लिने विज्ञप्तिमा उल्लेख छ । भूकम्पपछि गोर्खाहरुबाट स्थानीय समुदायका लागि भएका गतिविधिबारे समेत ह्यारीले जानकारी लिनेछन् ।

उनले सधैं ब्रिटिश गोर्खा सैनिकको खुलेर प्रशंसा गर्दै आएका छन् । अफगानिस्तान युद्धमा गोर्खाहरुसंगै दुई पटक अग्रपंक्तिमा लडेका ह्यारीले आफू गोर्खाहरुसंग रहंदा सबैभन्दा बढि सुरक्षित महशुस हुने बताउंदै आएका छन् ।

ह्यारीले नेपालको प्राकृतिक रसस्वादन समेत गर्नेछन् । उनले राष्ट्रिय निकुन्ज र 
ट्रेकिंग जाने समेत तय गरेका छन् ।

एक विज्ञप्तिमा दरवारका प्रवक्ताले ह्यारी पहिलोपटक नेपाल भ्रमण गर्न ज्यादै लालयित भएको बताएका छन् । बेलायत र नेपालले कुटनीतिक सम्वन्ध स्थापनाको दुई सय वर्ष गांठ मनाइरहंदा ह्यारीले दुई देशबीचको मजवुत सम्वन्ध र नेपालीले दिने आतिथ्यको समेत अनुभव लिने जनाइएको छ ।

यसअघि बेलायती महारानी एलिजावेथ द्वितिय र प्रिन्स फिलिपले सन् १९६१ र १९८६ मा नेपाल भ्रमण गरेका थिए । राजकुमारी डायना, प्रिन्स चाल्र्ससहित बेलायती मन्त्रीहरुको नेपाल भ्रमण भइरहेपनि बेलायती प्रधानमन्त्रीको भने नेपाल भ्रमण इतिहासमै हुन सकेको छैन् ।

प्रतिक्रिया

सम्बन्धित सामाग्री