मंगलबार, असोज १३ २०७७ | Tue, September 29, 2020
नेपालको समय: २१:४४ | UK Time: 16:59

उसुमा नेपाललाई पहिलो स्वर्ण पदक

वीनेपाली
२०७२ माघ २५ गते ८:१४

Bijay-Singali-and-susmita-Tamang-650

गुवाहाटी (भारत), २५ माघ । भारतको सिलोंगमा जारी बाह्रौँ दक्षिण एसियाली खेलकुदअन्तर्गत आज नेपालले पहिलो स्वर्ण पदक जितेको छ ।
प्रतियोगिता सुरु भएको चौथो दिनमा नेपालले स्वर्ण पदक जितेको हो । नेपालका लागि उसु तर्फको नान्ताओउतर्फ निमा घर्तिमगरले नेपाललाई स्वर्ण पदक दिलाएकी हुन् ।

आइतबार भएको पहिलो चरणमा उनले ८.४५ र आज भएको दोस्रो चरणमा ८.४६ गरी कुल १६.९१ अङ्कसहित स्वर्ण जितेकी हुन् । रुकुम घर भएकी निमा ललितपुरको ग्वार्कोमा बस्छिन् । उनी डनबस्को बोर्डिङ स्कुलमा कक्षा १० मा अध्ययनरत छिन् । उनको यो पहिलो अन्तर्राष्ट्रिय सहभागिता हो । स्वर्ण जितेकी उनले देशका लागि पहिलो स्वर्ण पदक दिलाउन सकेकामा आफूलाई एकदमै गर्व लागेको बताइन् ।

यस्तै, उसुको नानकुनतर्फ पनि आज नेपालले एक रजत पदक प्राप्त गरेको छ । आज भएको प्रतिस्पर्धामा नेपालका युवराज थापाले रजत पदक जितेका हुन् । उनले पहिलो चरणमा ८.८८ र आज भएको दोस्रो चरणमा ९.२१ गरी कुल १८.१३ अङ्कसहित रजत पदक दिलाएका हुन् । आजको प्रतिस्पर्धामा सबैभन्दा धेरै अङ्क प्राप्त गरे पनि हिजोको प्रतिस्पर्धामा केही अङ्क कम भएकाले रजतमा चित्त बुझाउनु परेको हो । उनको भन्दा ०.७ अङ्कले अघि रहेको भारतले स्वर्ण पदक जित्यो । यी पदकसँगै नेपालको पदक सङ्ख्या ११ पुगेको छ । तिनमा १ स्वर्ण, ४ रजत र ६ कास्य छन् ।

प्रतिक्रिया

सम्बन्धित सामाग्री

फेसबुक