लन्डन । विज्ञान प्रसाईंले नेतृत्व गरेको नेपाली जनसम्पर्क समिति बेलायतको अधिवेशन आगामी फेब्रुअरी २१ मा हुने भएको छ । समितिका संयोजक विज्ञान प्रसाईंको अध्यक्षतामा आइतबार २४ जनवरीमा ह्यारो, लन्डनमा सम्पन्न कार्यसम्पादन समितिको बैठकले उक्त निर्णय गरेको हो ।
नेपाली कांग्रेस केन्द्रिय कार्यालयको निर्देशन बमोजिम पार्टीको आसन्न १३ औं महाधिवेशन अगावै नेपाली जनसम्पर्क समिति बेलायतले सिफारिस गरि पठाएका र केन्द्रले स्वीकृत गरेका क्रियाशिल सदस्यहरुको उपस्थितिमा फेब्रुअरी २१ तारिखका दिन अधिवेशन गर्ने निर्णय भएको अधिवेशन तयारी समितिका संयोजक शान्तबिनोद लामिछानेले जानकारी दिए । बैठकले सोही अनुरुप काम कारवाही अगाडि बढाउन सम्पूर्ण उपसमितिहरुलाई निर्देशन दिएको छ ।
बैठकले पार्टीले तोकेको केन्द्रिय प्रतिनिधि तथा परिवेक्षकका लागि आवश्यक सम्पूर्ण कागजात केन्द्रलाई उपलब्ध गराउने निर्णय पनि गरेको छ ।
