साउदीमा ५० नेपाली कामदार बन्धक, उद्धारमा दूतावासको पहल

साउदी अरब, ४ माघ । साउदी अरबस्थित एक कम्पनीमा बन्दी सरह जीवन बिताइरहेका नेपाली कामदारको उद्धारका लागि पहल थालिएको छ ।

रियादमा रहेको नेपाली दूतावासले मोहम्मद अलमोजिल ग्रुप कम्पनी (एमएमजी) मा बन्धक बनाइएका ५० नेपाली कामदारको उद्धार गर्न पहल थालेको हो । ती नेपाली कामदारलाई उद्धार गरी स्वदेश फिर्तीका लागि प्रक्रिया अघि बढाइएको साउदीका लागि कार्यवाहक नेपाली राजदूत आनन्दप्रसाद शर्माले जानकारी दिए ।

पटक–पटक आग्रह गर्दा पनि रोजगारदाता कम्पनीले अटेर गरेपछि पूर्वी क्षेत्रीय डेपुटी गर्भनर डा खालिद मोहम्मद अल बतल र श्रम कार्यालयका महानिर्देशक ओमर बिन साले अलअम्रीसँग भेटवार्ता गरी नेपाली कामदारको उद्धारका लागि पहल गरिएको शर्माले बताए ।

पूर्वी क्षेत्रीय डेपुटी गर्भनर र श्रम कार्यालयका महानिर्देशकको निर्देशन पछि रोजगारदाताले नेपाली कामदारलाई स्वदेश फिर्ता पठाउन सहमत भएको हो ।

शर्माका अनुसार २१ नेपालीलाई स्वदेश फिर्तीका लागि भिसा प्रक्रिया अगाडि बढिसकेको छ । जसमध्ये नौ जनाको यही हप्ताभित्रै स्वदेश फर्कने व्यवस्था मिलाइएको र बाँकी १२ को अर्को लटमा व्यवस्था गरिएको दूतावासले जनाएको छ । तीन जना नेपालीलाई भने यसअघि नै उद्धार गरी स्वदेश पठाई सकिएको छ । नेपाल फर्कन नचाहेका बाँकी कामदारलाई भने अन्य कम्पनीमा सर्ने व्यवस्था मिलाइएको दूतावासले जनाएको छ ।

रोजगारदाता कम्पनीले यहाँको आवास अनुमतिपत्र (अकमा) नवीकरण नगरिदिँदा ती नेपाली कामदार एक वर्षदेखि बन्दी सरह जीवन बिताउन बाध्य भएका थिए ।