सोमबार, माघ १२ २०७७ | Mon, January 25, 2021
नेपालको समय: १५:३० | UK Time: 09:45

चार्लटन समाजले हाजिरी जवाफ प्रतियोगिता गर्ने

वीनेपाली
२०७२ माघ १ गते ११:५३

12583656_10156410350195494_1311951573_n

लन्डन । साउथ इस्ट लन्डनमा सक्रिय चार्लटन नेपाली समाज यूकेले नेपाली युवायुवतीबीच एक खुल्ला हाजिरी जवाफ प्रतियोगिता आयोजना 
गर्ने भएको छ ।

आगामी फेब्रुअरी २१ तारिखका दिन आयोजना गरिने उक्त प्रतियोगितामा बेलायतका विभिन्न स्थानीय नेपाली संघ संस्थाहरुलाई आफ्ना बाल बालिकाहरु सहभागी गराइदिन आव्हान गरिएको छ । प्रतियोगितामा मुख्यतया नेपालसंग सम्बन्धित प्रश्नहरु सोधिने छ जसको विषय वस्तु समेत सहभागीहरुलाई प्रतियोगिता पहिले नै उपलब्ध गराइने आयोजकले जनाएका छन् । कार्यक्रम लन्डन चार्लटनस्थित एसेम्वली हलमा हुनेछ ।

प्रतियोगिताको संयोजन गरिरहेका चार्लटन नेपाली समाजका सचिव टि एन रिजालले बेलायतमा रहेका नेपाली अविभावकहरुले संस्थागत रुपमा आफ्ना नानीहरुलाई सामूहिक सहभागी गराउन सक्ने जनाए ।

तोकिएको समयावधि भित्र आवेदन दिनेहरुलाई तीन जनाको ग्रुपको रुपमा प्रतियोगितामा प्रवेश दिइने रिजालले बताए । यसका लागि यूकेका अन्य नेपाली संस्थाहरुको सहभागितामूलक सहयोग अपेक्षा गरेको समेत उनले बताए ।

चार्लटन नेपाली समाज यूकेका अध्यक्ष रोमनाथ पाण्डेले आफ्नो समाज नेपाली नयां पुस्ताको व्यक्तित्व विकास तथा सामूदायिक सामिप्यतामा सधैं लागि परिरहेको बताए ।

‘हाम्रा केटाकेटीलाई नेपाल र नेपालीसंग सधैं कसरी जोडेर राख्न सकिन्छ भन्नेमा हाम्रो ध्यान केन्द्रित छ’, उनले भने ।

प्रतियोगितामा सहभागी हुन इच्छुकहरुले यही जनवरी अन्त्यसम्म आफनो बसोबास रहेको क्षेत्रमा भएका स्थानीय नेपाली समाजसंगको समन्वयमा तीन जनाको समूह बनाएर समाजको वेवसाइटमा उपलव्ध फाराम भर्नुपर्नेछ ।
चार्लटन नेपाली समाजले लामो समयदेखि स्थानीय केटाकेटीहरुलाई नेपाली भाषा सिकाउन ‘लर्न नेपाली प्रोग्राम’ को रुपमा नेपाली भाषा कक्षाको सफल सञ्चालन गर्दै आइरहेको छ ।

लर्न नेपाली प्रोग्राम संयोजकको रुपमा कार्यरत समाजका पूर्व अध्यक्ष सुरज केसीले भाषा कक्षामा नेपाली भाषा मात्र नभएर नेपाली परम्परा, कला तथा संस्कृतिको समेत व्यवहारिक ज्ञान दिइने गरेको बताए ।

समाजले शुरु गरेको उक्त प्रोग्रामको सफलतासंगै बेलायतमा रहेका अन्य नेपाली संघ संस्थाले पनि नेपाली भाषा कक्षा सञ्चालनमा ल्याएका छन् ।

यसैबीच चार्लटन नेपाली समाजले भाषा कक्षा सञ्चालन भएकै स्थान चार्लटन म्यानर स्कुलमा एक बैठक आयोजना गरेको थियो । कार्यसमिति तथा सल्लाहकारहरु सम्मिलित उक्त बैठकमा नेपाली भाषा कक्षाको समिक्षा गर्दै स्वयं सेविकाको रुपमा कार्यरत शिक्षिका मञ्जु खरेललाई लर्न नेपाली प्रोग्रामको सह संयोजकको जिम्मेवारी दिने निर्णय समेत गरेको छ । साथै 
बैठकमा भाषा कक्षाको सञ्चालनमा योगदान पुर्याउंदै आएका सबै 
स्वयंसेवक, शिक्षक तथा अभिभावकहरुप्रति आभार व्यक्त गरेको छ ।

बैठकमा संस्थाका भावी कार्यक्रमहरुबारे पनि छलफल गरिएको थियो ।
बैठकले समाजको आयोजनामा हुने आसन्न युवा हाजिर जवाफ प्रतियोगिता सफल बनाउन सम्बन्धित सबैमा अनुरोध गरेको छ ।

प्रतिक्रिया

सम्बन्धित सामाग्री

फेसबुक